Busturialdeko Hitza

Busti irratian parte hartu gura dutenentzako deialdia: gaur, 19:00etan, Gernikako kultur etxean

Tantaz tanta, Busturialdeko hainbat gaztek irrati berri bat sortu dute: Busti irratia. Irrati librea eta parte-hartzailea da eraiki gura dutena, eta tanta gehiago batzeko asmoa dute, irratizale eta kolaboratzaile gehiagorekin osatzen joateko proiektua, olatua.

Oraingoz, interneteko itsaso zabalean emitituko dute, sarean nabegatuko dute soinu bustiek: www.bustirratia.info helbidean. Aurrera begira, uhinetan bidaiatzea da asmoa, haize hezeetan zehar.

Lehendabiziko zuzeneko saioa apirilaren 4ean emitituko dute, Lizeo Antzokitik. Hortik aurrera, 24 orduz sareratuko dute seinalea, eta magazine bat izango da Busti irratiko lehendabiziko irratsaioa, astelehen iluntzero.

Astra gaztetxean isuri zen irrati bat sortzeko ideia, iaz, hackelarreko esperimentu baten ostean. Hasierako arazo nagusienetako bat, Astra gaztetxetik irten behar izan duten ekimen askoren arazo bera da: leku baten beharra. Busti irratiak entzunaraziko duen mezuetako bat izango da, tantetako bat.

Eta parte hartzearena?

Ba, gaur, astelehena, 19:00etan da hitzordua, Gernikako Kultur Etxean batuko gara irrati libre honetan era batera edo bestera parte hartu gura dugunok. Zu ere bertan izatea gura dugu, animatu zaitez. Eta zelan ez, animatu lagunen bat ere, seguru gaude-eta ezagutuko duzula bertan parte hartu gura duenen bat.

Tanta guztiak, tanta bustiak.