Busturialdeko Hitza

«Garrantzitsua da nire lana jendeari gustatzen zaiola ikustea»

liher goienetxea `Astillas´ ð- Artista

Kultura

Sei-zazpi urte daramatza artistak portua gai nagusi duten lanak margotzen. Bere lanen %50 saltzen dituela dio.

n. salazar

Erakusketa zabaldu berri zuela `Astillas´-ek gustukoen duen lana ekarri gabe zuen eguazten iluntzean. Dendan izaten du 160x80 zentimetroko koadroa, `Portu Zaharra´ izenekoa.

Noiz hasi zinen lan hauek margozten? Zenbat denborako lana dago ikusgai hemen?

Duela urtebete hasi nintzen, urtebeteko lana da, beraz. Hau bukatu eta gero opor antzekoak hartzen ditut; norbaitek enkargu bat eginez gero soilik egiten dut lan. Gero, Gabonak aldera hasi ohi naiz hurrengo urtekoa prestatzen.

Egurraren gainean margotzen duzu. Ze teknika erabiltzen duzu?

Marrazkia arkatzarekin egiten dut, leun-leun. Ondoren, akuarelarekin margozten dut eta gero erre egiten dut. Itzalak erreta egiten ditut, pirografoarekin.

Bermeoko portuaz gain, Izaro eta Gaztelugatxe ere ageri dira lanetan.

Bai, koadro horiek, portukoak egin eta egin ibili eta gero, burua askatzeko egin nituenetako batzuk dira. Gaur egun oraindik ere, jende asko erakartzen dute Izarok eta Gaztelugatxek.

Madalena jaia igaro berri da. Zer suposatzen du bermeotar batentzat Izarok?

Mundu bat da Izaro bermeotarrontzat. Egunero aurrez aurre izan arren, mundu bat da guretzat.

Bestalde, neurri bera duten hamaika koadro egin dituzu. Portuko irudi desberdinak ematen dituzte.

Bai, portua ageri da zatituta. Lan hori dakarten hirugarren urtea da. Egin nuen lehen urtean pertsona batek erosi zizkidan lan guzti horiek, baina ez zitzaidan gustatu zertarako nahi zituen esatea. Opariak egiteko erosi zituen, pertsona bakoitzari lan horietako bana oparitzeko asmoa zuen. Lan hori, ordea, osotasun bat da, portu osoa zatika erakusten duten koadroak dira. Iaz ere saldu nituen, baina banan-banan. 11 koadro horiek pertsona bakar batek erosi eta gela batean, denak batera, jartzea gustatuko litzaidake niri. Hori litzateke egokiena.

Koadro guztietatik batek deitzen du arreta, desberdinena dirudien batek, Zain dezagun Baleak izenekoak.

Mundu honetan sartu nintzenean egiten nituen moduko marrazkia da, margorik gabea. Horrela aritu nintzen hasieran, geroago hasi nintzen akuarela sartzen.

Zure lanak erosteko aukera ere badago, denda bat daukazu eta.

Bai, markoak jartzen ditut dendan, baina nire lanak ere ikusgai daude han.

Zer da zuretzat norbaitek zure lan bat erosi nahi izatea?

Bi gauza garrantzitsu. Batetik, diru sarrera bat eta, bestetik, nire lana jendeari gustatu egiten zaiola ikustea.