Busturialdeko Hitza

Gaur hasi eta domekara bitartean, III. Motor Jaia egingo dute Gernika-Lumon, Urdaibikersek antolatuta. Aurten, gainera, jaialdi honetarako prestatu dituzten jarduera gehienak erdigunean egingo dituztela iragarri dute antolatzaileek, Motor Jaiaren lehenengo edizioan egin zuten bezala .

Horrela, hiru egun horietan girorik ez da faltako herrian, asko dira-eta motozaleek antolatu dituzten ekitaldiak: moto irteerak, barbakoa, film emanaldiak...

Urtero legez, stunt-man showa egingo dute aurten ere. Hain zuzen, `Leve ta Roue´-ko moto gidari ausartak izango dira ikusleen ikusmina asetzearen arduradunak. Zapatuan 18:30ean izango da ikuskizuna, eta domekan 16:00etan.

Iaz baino lagun gehiago batzea espero dute

Aurten iaz baino lagun gehiago batu gura ditu Urdaibikersek, III. Motor Jaian. Hain zuzen, 2.000 motozale inguru batzea da antolatzaileen asmoa. Hori lortzeko, izena ematerakoan ordaindu beharrekoa sinbolikoa izango dela diote: bost euro. Izan ere, lehenengo urteetan jaiak indarra hartzea baita Urdaibikersen helburua.

667783721-619855072 telefono zenbakietara deituta eman daiteke izena. Bestela, jaialdiaren hiru egunetan ere horretarako aukera izango da. Gaur bertan San kristobal enparantzan eman daiteke izena, 15:30etik aurrera. Bihar, Pasealekuan ipiniko dute izena emateko mahaia, eta 11:00etan hasiko dira inskripzioak hartzen. Etzi, ordea, 09:00etan hasiko dira lan horretan, Pasealekuan bertan.

Motoaren zozketa

Jaialdian parte hartzeko izena ematen dutenek eguneko jardueretan parte hartu ahal izango dute: irteerak, akanpada, barbakoa, afaria, gosaria, stunt-man showa...

Hori guztiaz gain, moto bat zotz egingo du Urdaibikersek aurtengo edizioan. Herriko tabernetan eta dendetan ipini dituzte txartelak salgai, euro bakarraren truke.