Busturialdeko Hitza

Martxan da dagoeneko Kurtzio eta Zarragoitxi auzoak lotzen dituen igogailua, atzo inauguratu baitzuten,. Xabier Legarreta Bermeoko alkatea eta bere udal taldekideez gain, Manuel Urkijo Eusko Jaurlaritzako Ekonomia, Aurrekontu eta Kontrol Ekonomikorako sailburuordea ere izan zen inaugurazioan.

Legarretak «eskerrak» eman zizkion Eusko Jaurlaritzari proiektu hori Gobernuaren «Izartu programaren bidez finantzatu delako». Haren esanetan, «azpiegitura garrantzitsua» da atzo inauguratu zutena.

«Irisgarritasun arazo handiak»

Gogora ekarri zuen Zarragoitxiko bizilagunek «irisgarritasun arazo handiak» izan dituztela, kontuan izanda orain arte auzo horretara iristeko aldapa gogorra duen errepidea baino ez dela egon. Igogailua «aurrerapauso garrantzitsua» dela deritzo, beraz, Bermeoko alkateak.

Ekitaldi laburra izan zen atzokoa. Alkateak, hitz gutxi batzuk esan ondoren, igogailua inauguratzeko zinta moztu zuen eta barruan sartu zen udaleko beste taldekide batzuekin eta Eusko Jaurlaritzako ordezkariarekin batera, lehen igoera egitera. Segundo gutxi batzuen buruan egin daiteke, orain, Kurtziotik Zarragoitxirako bidea.

900.000 euroko aurrekontua

Obrak 900.000 euroko aurrekontua izan du . Hamasei lagunentzako tokia dauka igogailuak eta, larrialdiren bat gertatuz gero, esku-ohe bat sartzeko tokia ere badauka. Horrez gain, lau kamera ere baditu.

Hala ere, Legarretak aurrerago iragarri zuen bezala, proiektu hori «ez da azken konponbidea izango», haren esanetan, ordea, «aurrerapauso garrantzitsua da».

Izan ere, alkateak aurreratu zuenez, Plan Orokorraren proiektuak «Askatasun kalearen atzean kale berri bat egokitzea aurreikusten du». Konponbide posible hori, oraingoz, «aurrerapen fasean» baino ez dagoela argi utzi nahi izan zuen, ordea, Legarretak.

Egun Zarragoitxira iristeko dagoen errepidearen «aldatsa zuzentzen erraza» ez dela azaldu zuen. Beraz, «konponbide bakarra Askatasun bidearekiko paraleloan kale bat ateratzea» dela gaineratu zuen.