Busturialdeko Hitza

Ibarrangeluko herriak bihar egingo dio omenaldia `Bou Nabarra´ ontziko marinel Juan Telletxeari. Akordarra Matxitxakoko batailan borrokatu ziren marineletatik bizirik dagoen bakarra da. Ekitaldia 13:30ean hasiko da Akordako plazan. Bertan, Elena Solatxik Telletxearen omenez egindako eskultura inauguratuko dute.

Omenaldia Akorda auzoko jaien ekitaldi nagusia izango da. Izan ere, aurten Matxitxakoko batailaren 71. urteurrena da.

Elena Solatxiren eskultura

Elena Solatxi eskultoreak argi dauka Ibarrangeluko Udalaren aginduak duen pisu emozionala. «Nire aita errepublikaren alde borrokatu zen Gerra Zibilean». Eskultoreak omenaldiak behar-beharrezkoak direla uste du, «historiak baztertu dituen heroiak gogorarazteko modua da eta udalek Ibarrangeluko eredua jarraitu behar dute».

Akordako plazan jarriko duten eskultura «Ereñoko harrobitik ateratako marmol arrosagaz» egin du.

Materialaren aukeraketa egiteko «jendearen elkarreragina» antzematea izan da Solatxik jarraitu duen irizpidea. «Materialak kolorez aldatzen joango dira, nire ideia eskultura erabilgarria egitea izan delako».

Eskultorea `Bou Nabarra´ ontziaren historian oinarritu da. «`Bou Nabarra´' ontzi txikia txikia zen eta ia ez zeukan ekipamendurik, baina `Canarias´ bezalako ontzi erraldoiari aurre egin zion».