Busturialdeko Hitza

Amaitu dira zurrumurruak eta azkenean konfirmatu da. Asteon erdi agerian utzi legez, Guggenheim museoaren Urdaibaiko egoitza Sukarrietako lurretan egingo dute, BBK-k herri horretan dituen udalekuen lursailean. Hala esan zuten atzo goizean Jose Luis Bilbao Ahaldun Nagusiak eta Xabier de Irala BBK-ko presidenteak, Guggenheim museo berria Sukarrietako hondartzaren ondoan eraikiko dutela konfirmatuz.

Hortaz, urte batzuk barru Sukarrietako hondartzaren inguruko paisaia guztiz eraldatuko da. Oraindik, hala ere, ez dute zehaztu proiektua zein epetan burutuko duten. Gainera, museo berriaren kokapen hori behin betikoa izan dadin, BBK-k eta Aldundiak lurren permuta edo trukea onartu beharko dute lehenbizi, udalekuak Eara lekualdatu nahi baitituzte, Aldundiaren jabetzakoa den lursail batera, hain justu.

Irisgarritasun ona

Alde biek proiektuak aurrera egin dezan «borondate argia» dutela azpimarratu dute, eta beharrezko azterketak hainbat arinen egiteko konpromisoa hartu dute. Izan ere, Bilbaok esan duenez, museo berriaren proiektua estrategikoa da, «Urdaibairentzat ez ezik, EAE osoarentzat».

Kokapena baieztatzeaz gain, beste leku batzuk zergatik baztertu dituzten eman zuen jakitera Jose Luis Bilbaok. Gernika-Lumoko lursailean uholde arriskua egon daitekeela eta lurrak kontaminatuta daudela azaldu zuen. Gainera, inguruan hesi arkitektonikoak eta tren-pasabideak dauela aipatu zuen. Muruetako ontziola dagoen gunea ere albo batera utzi dute, museoa han eraikitzeko enpresa historikoa deslokalizatu beharko luketela argudiatuta.

Mundaka izan zitekeen balizko kokapen bat, baina hori ere baztertu dute, nekazal-erabilera baitauka aztertutako lursailak eta, ondorioz, bertan ezin daitekeelako eraiki. Bilbaoren arabera, aukera- tutakoa «kokapen ideala» da, «ingurumen ikuspuntutik zein hirigintzakotik».

Azaldu zuenez, udalekuen lursailak 80.000 metro koadro ditu eta ez du hirigintza-arazorik ekarriko, aisialdirako gune eta espazio kultural legez kalifikatuta baitago. Irisgarritasun ona daukala ere gogorarazi zuen Ahaldunak, tren eta Bizkaibus geltokiak hurbil dituela eta aparkaleku handia daukala agertuz. Era berean, eskualderako aurreikusi dituzten azpiegiturak ere ekarri zituen gogora, Sollubeko eta Autzagako tunelak, hain zuzen ere.

Biosfera Erreserbari eragin diezaioketen kalterik existitzen ez dela gaineratu zuen Bilbaok. «Badago dagoeneko eraikin bat gune horretan eta, beraz, ondorengo jarduera batek ez du ingurumena kaltetuko». Horren harira, Guggenheim berria udalekuen eraikina baino txikiagoa izango dela argitu zuen. «Ez da inolaz ere Biosfera Erreserba erasotuko».

«Aztertutako proiektua»

Urdaibaiko Guggenheim museoaren xehetasunei dagokienez, «oraindik pauso asko emateko» daudela, baina «behar bazala aztertutako proiektua» dela esan zuen Bilbaok. «Gainera, etengabeko gainbehera ekonomikoa bizitzen ari den eskualdearen aktibitatea sustatuko du», bere iritziz.

Museoaren diseinua irailean martxan jarriko duten nazioarteko lehiaketa publiko baten bitartez erabakiko dute, mundu mailako arkitektoek euren ideiak bertan proposatu ditzaten. Ekarpen horien araberakoa izango da, Bilbaoren arabera, proiektuaren garapena.

Edukinaren gainean ere mintzatu zen Ahaldun Nagusia. «Hainbat ideia ari gara aztertzen, baina nortasun propioa duen proiektua dela esan genezake. Horrela, artea eta natura uztartuko dituen egitasmoa dela eta gaur egungo zein XX. mendeko obrak bilduko dituela esan zuen. Gauzak horrela, laster New Yorkera (AEB) joango direla agertu zuen Bilbaok, Solomon Guggenheim Fundazioari proiektua «behar bezala azaltzera».