Busturialdeko Hitza

Astra eraikinaren inguruan dagoen lursaila erosteko negoziazioek eman dituzte fruituak dagoeneko. Atzo bertan sinatu zuten Jose Mari Gorroño alkateak eta Jose Maria Garmendiak salerosketa kontratua, notario aurrean. Alkateak esan zuenez, «1910 urte aldera Unceta y Esperanza enpresari utzi zitzaion lurra eta 1913an jarri zuten martxan garai hartako mugimendu ekonomikoa suspertu zuen arma lantegia. Orain, ia 100 urte beranduago, ia 14.000 metro koadro horiek berreskuratu ditu Udalak».

Astrak eragindako astinaldi ekonomiko horren pausoak jarraitu nahi ditu Udalak. «Gaurko [atzoko] eguna inflexio puntu bat izatea nahi dugu. Aktibitate ekonomiko berriak sortzeko balioko du eta, modu horretan, Gernika-Lumoren zein eskualde osoaren biziberritzea lortu dezakegu».

3,9 milioi euro

Gorroñok berretsi zuenez, bi gunetan egongo da banatuta lursaila. «Batetik, energia berrietan zentratuta egongo den Goi Mailako ikasketa zentroaren gunea egongo da han eta, bestetik, gune soziokulturala».

Duela aste batzuk egindako adierazpenen hari beretik, gune soziokultural hori etorkizun batean Pablo Picassoren `Guernica´ koadroa hartzeko leku aproposa litzatekeela gaineratu zuen, koadroaren berezko kokagunea Gernika-Lumo dela azpimarratuz.

3,9 milioi euro ordaindu ditu Udalak erosi berri duen Astrako lursaila. Orain bi urte inguru aurreko legegintzaldiko udal gobernuak erosi zion Inmogroup enpresari beste zati bat. Kasu horretan, eremua txikiagoa izanik, 940.000 euro ordaindu zituen Udalak.

Eguazteneko osoko bilkuran 3.500.000 euroko mailegua eskatzea adostu zuen aho batez udalbatzak. Mailegua hogei urtetan ordaindu beharko zaio banketxe emaileari.