Busturialdeko Hitza

Euskara bultzatzeko zenbait proiektu onartu ditu Euskera Batzordeak uztaileko batzarrean.

Alde batetik, iragan ikasturtean euskara ikasten aritu zirenetako 70 ikasle bermeotarren artean 13.771,69 euroko diru laguntzak banatuko dituzte.

Bestalde, Berbalagun egitasmoa datorren ikasturtean berriro martxan jartzea onartu dute, aurreko urtearen balorazioa egin eta gero. Datorren barikuan Osoko Bilkurak egingo duen batzarrean hitzarmena sinatzeko erabakia hartuko dutela aurreratu dute. Horrez gain, xehetasun guztiak irailean emango dituztela agertu du Euskara Batzordeak.

`Kuadrillategi´ egitasmoari dagokionez, datorren ikasturtean ere aurrera jarraituko du eta berritasunak ere izango dira. Orain arte, «GIZ-GEZek eta Euskara Sailak elkarlanean bideratzen zuten proiektua 12 eta 14 urte artekoentzat zen» baina «aurrerantzean 16ra artekoentzat» zabalduko dute aisialdiko eskaintza hori.

Etorkinentzako eskolak

Datorren ikasturtean ere etorkinentzako 60 orduko euskara eskolak antolatuko dituzte. Urrian hasiko dira.

Hilabete horretan bertan jarriko dituzte martxan gurasoentzako eskolak eta txokoa. Euskara ez dakitenentzako izateaz gain, hizkuntza hori «berbetan jakin arren alfabetatu egin nahi dutenei» ere zuzenduta daude.

Bestalde, ikastetxeetako jantokietako begiraleei eskainitako ikastaroen eta gazteen artean irakurzaletasuna bultzatzeko Gaztezulo aldizkaria banatzeko egitasmoen «balorazio ona» egin dute eta hasieran planteatutako «helburuak bete» egin direla jakinarazi du Euskara Batzordeak.