Busturialdeko Hitza

Urdaibaiko traineruak sailkapen orokorraren lehen postua eskuratu zuen domekan, Bandera Telefonicaren X. edizioan bigarren gelditu ostean. Zapatuan, berriz, Bermeoko taldeak Pasai San Pedroko Kofradiaren XIV. Ikurriña bereganatu zuen. Sailkapen orokorrean, Urdaibaik bost puntuko aldea atera dio Orioko traineruari. Hala ere, Urdaibaiko entrenatzaile Patxi Bilbao zuhur azaldu da. Prestatzaileak argi dauka taldeak «epe laburrerako helburuak» baino ez dituela buruan eta liga irabazteko, «estropadaz estropada» joan beharra dagoela.

Bost puntuko aldea

Urdaibai Unpro Avia trainerua Pasai San Pedron nagusitu zen, denboraldiko hirugarren garaipena lortuz. Taldeak Castrori segundu bakarra atera zion, baina kantabriarrek sailkapenaren lidergoa eskuratu zuten. Izan ere, bermeotarrek Boiron lortutako bederatzigarren postuak Castroko mutilen itxaropenak lagundu zituen.

Kontxan jokatu zen estropadan, ordea, Orio garaipena lortzeko borrokan sartu zen eta lehenbiziko postua eskuratu zuen, Urdaibai bigarren utziz. Askok baldintza mesedegarrietan lehiatzea leporatu zioten arren, Bilbaok garaileak zoriontzeko beharra azpimarratu du: «Egia da Orio azken txandan aritu zela eta ordurako baldintza hobeagoak zirela. Gurean haizeak eta olatualdiak ia ezinezko egin ziguten ganorazko estropada egitea, baina eurekin batera beste traineru batzuk aritu ziren eta esan beharra dago lehia garbi irabazi zutela ».

Urdaibaik lidergoa eskuratu zuen domekan eta entrenatzaileak argi dauka lortutakoaren garrantzia. Boiroko emaitza eskasaren ostean, «garaipena eskuratzeko gai garela erakutsi dugu. Gainera, harro egoteko moduko emaitza dugu, zuzeneko lehiakideei aldea ateratzeko balio duelako baita ere». Bilbaok sailkapenaren lehen postua taldeak asteburuan erakutsitako erregulartasunaren ondorioa dela ziurtatu du: «Zapatuan irabazi eta domekan, bigarren postua lortu dugu. Beraz, lidergoa erregulartasunari esker lortu dugu».

Pedreña eta Plentzia

ACT Ligaren hurrengo urratsa zapatuan jolastuko den Pedreñako Marina Cudeyo IV. Bandera izango da. Bilbaok argi dauka taldeak jarraitu beharreko estrategia: «Urdaibaiko traineruaren helburua garaipena izango da. Bide batez, emaitza onak lidergoaren mantentzea ekar dezake, baina taldeak estropadaz estropada irabazteko helburua izan behar du».

Domekan, berriz, San Miguel Liga Euskal Herrira itzuliko da. Arraunlariek Plentzian izango dute hitzordua, Naturgas Ikurriñan, hain zuzen ere.