Busturialdeko Hitza

Azken bi hilabeteetan Gasteizen izan da ikusgai Eusko Legebiltzarrak sustatutako `Biktimak´ erakusketa. «Milaka» izan dira denbora tarte horretan lagina ikustera hurreratu diren lagunak. Orain, eta abuztuaren 31ra bitartean, Gernika-Lumon izango da ikusgai, Batzar Etxean, hain zuzen ere.

Atzo goizean izan zen inaugurazio ekitaldia, Juntetxean bertan. Han ziren, besteren artean, Ana Madariaga Bizkaiko Batzar Orokorretako presidentea, Izaskun Bilbao Eusko Legebiltzarreko presidentea, Jose Luis Bilbao Ahaldun Nagusia eta Manuel Jodar 1989an ETAren atentatu batean hildako Espainiako Poliziaren artezilari izandakoaren alarguna, Leonor Regaño. Bigarren plano batean izan ziren zenbait alderdi politikotako ordezkariak eta Eusko Jaurlaritzako Terrorismoaren Biktimen Arretarako zuzendari Maixabel Lasa, besteak beste.

«Eraginkortasun morala»

Ana Madariagak ongi etorria eman zien bertaratutako guztiei eta atzokoa bezalako ekitaldia ohikoa baino «beroagoa eta hunkigarriagoa» dela esanez hasi zuen berbaldia. «Erakusketak biktimen egoeraz ohartarazteko balioko duela espero dugu».

«Biolentziaren antzutasunaren salaketa hainbat lekutara» eramatea dutela helburu esan zuen Izaskun Bilbaok eta Pablo Picassoren `Guernica´ koadroari buruzko aipua egin zuen. «Erakusketak `Guernica´-k duen eraginkortasun moral berbera izatea nahi dugu». Horrez gain, bonbek izen-abizenak dituzten pertsonengan dutela eragina esan zuen, ETAri eskatuz «hiltzeari utz diezaiola, are gutxiago gure izenean, euskaldunon izenean».

Manuel Jodar zenaren alargunak hartu zuen hitza ondoren. «Batez ere begirada galduta duten umeen irudiak nahi ditut azpimarratu, beren aita zergatik hil duten ulertzen ez duten ume horietan».

Bestetik, politikarienganako hitzak ere esan zituen Regañok. «Adostasun batera heltzeko derrigortasuna dutela esan nahi diet politikariei. ETAkideek bakarrik modu horretara ulertuko baitute ez dutela armak baztertzea beste biderik». Hari beretik, politikariei gaizki egiten ari direnaz gogoeta egin dezatela eskatu zien.

Adiskidetzearen beharra

Ahaldun Nagusiak, bere aldetik, herri gaixo batean bizi garela aipatu zuen. «Norbait hiltzea merezi duen aberririk, erlijiorik edo ideiarik ez dago munduan». Adiskidetzearen beharraz mintzatuz amaitu zuen berbaldia Bilbaok.

Zenbait komunikabideren eta biktimen erakunderekin elkarlanean egindakoa da erakusketa. «Terrorismoaren biktimei» buruzko ehun bat argazki, testigantza eta film batzen ditu denetara.