Busturialdeko Hitza

Urtero legez, Euskal Herriko Surf Federazioak emakumeen zirkuituko bigarren proba egingo du bihar Lagan. Antolatzaileek aurreratu dutenez, «50 emakume inguruk» parte hartzea espero dute. Lagako proba 09:00etan hasiko da, baina, beti bezala, baldintza meteorologikoen eta olatuen egoeraren arabera jokatuko da.

Ekainaren 7an Zarautzen egindako lehiaketagaz eman zitzaion hasiera aurtengo emakumeen zirkuituari. Urtero bezala, Euskal Herritik zein kanpotik etorritako surflariak hiru mailatan lehiatuko dira: Open maila, 18 urtez azpikoena eta 16 urtez azpikoena. Momentuz, Mirka Martin, Garazi Sanchez eta Lucia Martiño dira sailkapenean lehenak, hurrenez hurren. Maila bakoitzeko irabazleak 500 euroko ordainsaria eskuratuko du. Edizio honetan ez da Busturialdeko surflaririk izango.

Emakumeak animatzeko

Euskal Surf Federazioak urtero antolatzen duen txapelketa emakume surflariei zuzendutako bakarra da Euskal Herrian zein Espainian. Federazioa emakumeen surfa berpizteko esfortzu berezia egiten ari da azken urteotan. Izan ere, surflari guztiek sariak jasotzen dituzte parte-hartze hutsagatik eta guztien artean bidaiak zozkatzen dira.

Surf zirkuituak azken urratsa egingo du abuztuaren 31n Zarauzko hondartzara bueltatuz. Egun horretan, Nesken Surf Biltzarra egingo dute. Zarauzko azken proban, «200 surflari baino gehiago» egotea aurrikusi dute antolatzaileek, aurreko urteotako parte-hartzaile kopurua kontuan hartuta.