Busturialdeko Hitza

Ereñoko Udalak eta Bizkaiko Foru Aldundiko Gizarte Ekintza sailak hitzarmena sinatu zuten atzo herrian ongizatearekin zerikusia duen egoitza bat eraikitzeko, Ereñoko alkate Juanjo Arribalzagak jakitera eman duenez. Egoitza Elexalde auzoan eraikiko dute eta, Arribalzagaren esanetan, «bi gunetan egongo da banatuta. Alde batetik, mendekotasuna duten hogei lagunentzako lekua izango duena eta, bestetik, elbarriak hartuko dituena. Azken horretan, 24 lagunentzako lekua izango da».

Alkateak argitu duenez, Ereñon egoitza egiteko asmoa aspalditik dator. Hasiera batean proiektua nagusientzako tokia egitera bideratu zuten, baina, azkenean, elbarriren bat duten bizilagunak hartzeko gunea ere egitea lortu du Udalak.

7.500 metro koadroko lursaila

Alkateak egoitzaren kokapena zehaztu du. «7.500 metro koadroko lursaila Elexalde auzoan dago, hirigunearen ondoan». Izan ere, Ereñoko Udala aspaldi ibili da egoitza egiteko lursail egoki baten bila. «Orain dela bi urte, bizilagun batek lurra utzi zigun bertan egoitza egiteko».

Udalak Aldundiaren konpromisoa eskatu du proiektuagaz aurrera jarraitzeko. «Behin zelaia lortuta, Gizarte Ekintza sailagaz harremanetan jarri eta azkenean hitzarmena lortu dugu». Arribalzagak zehaztu duenez, «Ereñoko Udalak lursaila jarriko du eta Foru Aldundiak kudeaketa lanak hartuko ditu bere gain hemendik aurrera».

Elexalde auzoko egoitzaren eraikuntza garrantzia handiko proiektua da, batez ere, 300 biztanle inguru dituen herrian. Izan ere, egoitzak, guztira, osasun-laguntza behar duten 42 lagun hartuko ditu, ereñotarrak, eskualdekoak zein bizkaitarrak.

Eraikuntza lanak 2009ko hasieran hasiko direla aurreikusten dute.