Busturialdeko Hitza

indusketa lanek agerian utzi dutena

Arrolako `oppidum´-a bigarren Burdin Aroaren amaiera garaiko harresiz inguratutako herrixka da. Kantauriar isurialdeko lurretan oso ohikoak ziren horietakoak. Kastroak zortzi hektarea hartzen zituen guztira eta, adituen arabera, garai hartan (k.a. III. mendean) gutxi gorabehera 150-160 herritar bizi omen ziren kastro horretan bertan.

Carlos Cortes Arrolako indusketa lanetan dabilen arkeologoa da. Cortesek berak adierazi duenez, Arrola harresitutako babesgune bat izateaz aparte, inguruko herrixken gune administratiboa ere izan zen bere garaian. Horrez gain, garai hartako herritarrek harresia babeserako baino gehiago ospea lortzeko eraiki zutela uste du arkeologoak .

Orain arte, batez ere, harresitik kanpo egin dituzte indusketa lan guztiak eta zeramikazko zein bestelako oso tresna gutxi aurkitu dituztela gaineratu du. Cortesen ustetan, barruko lanekin hasten direnean askoz gauza gehiago aurkituko dituzte.

Inkesta

1. Zer da auzolandegitik gehien gustatu zaizuna? 2. Etorri aurretik uste zenuena aurkitu al duzu Arrolako auzolandegian?

«Lanak, gogorra izanagatik ere, indarberritu egiten du»

Maria Chankovic

Belgrad (Serbia)

1. Taldean lan egitea eta bizitzen ari garen kultur esperientzia izan dira auzolandegiko gauzarik onenak. Lanak, gogorra izanagatik ere, indarberritu egiten zaitu. Naturan lan egitea ere izugarria da.

2. Gutxi gorabehera uste nuena topatu dut hemen. Ez dut sekula horrelako lanik egin, eta oso interesgarria iruditu zait. Asko zulatu dugun arren, beti aurkitzen dugu zerbait zulatzen jarraitzeko.

«Ez nekien aztarnategi hau hain garratzitsua zenik»

Jon Sanchez

Bilbo

1. Onena jendea da. Hona inor ezagutu gabe etortzen zara eta lagunak egiten dituzu egun gutxian. Gogoan izango ditut lagunekin pasatutako uneak.

2. Lehenago ere egona naiz beste auzolandegi batean, baina hau oso profesionala iruditu zait. Monitoreez gain, arkeologoak aurkitu ditugu lana zuzentzen. Ez nekien Arrolako kastroko aztarnategia hain garrantzitsua zenik.

«Uste dut arkeologia eta historia ikasiko dudala»

Lisa Küdde (1990)

Münster (alemania)

1. Lan arkeologikoa atsegin dut eta itzela da mundu guztiko jendearekin lan egitea. Esperientzia hau eta gero historia eta arkeologia ikasteko asmoa dut.

2. Beste gauza bat izango zela uste nuen. Indusketak egiterakoan zeramikazko gauzak eta beste tresna batzuk aurkituko genituela uste nuen. Hemen harresiak garbitzen ari gara, harri handiak, baina hau ere asko gustatzen zait.

«Handia da mundu guztiko jendea ezagutzea»

Vesna Novakoxic

belgrad (serbia)

1. Esperientzia oso handia da mungu guztiko jendea ezagutzea. Korear batek nola pentsatzen duen jakitea, adibidez, oso aberasgarria da. Harresiaren zati eder bat lehengoratu dugu eta horrek oso ondo sentiarazten nau.

2. Egia esan, ez nekien nora nentorren.Uste nuen Euskal Herria askoz ere lauagoa zela eta ez nuen espero horrenbesteko landaretza topatzea.

«Kultur arteko elkartrukea izan da onena»

Giulia Zarraroni

Milan (italia)

1. Gehien gustatu zaidana lagunak, jendea eta lana izan dira. Lan asko egin dugu baina emaitza ikusita harro sentitzekoa da. Kultur arteko elkartrukea eta elkar eragina ere asko gustatu zaizkit.

2. Aurton auzolandegi batean nagoen bigarren aldia da, iaz Langraiz Okan izan nintzen. Hango eta hemengo lana antzekoa izan da, banekien nolako lana egin beharko nuen.