Busturialdeko Hitza

Domeka honetan jokatuko da mendiko bizikletentzako prestatutako `Atxarre Extreme Joseba Arriola Zabalia Memoriala´. Bigarrenez egingo dute martxa eta iazkoan izandako 80 parte-hartzaileak gaindituko dituztela uste dute antolatzaileek.

Izena emateko aukera aspalditik dago zabalik. Antolatzaileen esanetan, «martxa onean» doa izen-ematea, baina oraindik ez dakite zenbat txirrindulari egongo diren irteera lerroan. Izan ere, antolatzaileen hitzetan, «egunean bertan jende asko apuntatzen da».

Gehienez ere 300 txirrindularik jokatu ahal izango dute proba eta, guztira, sei ordu izango dituzte proba bukatzeko. Ibilbidean zazpi anoa postu egongo dira banatuta txirrindulariak indar berritzeko.

Antolatzaileek ez diote garrantzia berezirik ematen parte-hartzaile kopuruari. Beraien hitzetan, «mendi bizikleta martxa etorkizunerako proiektua da eta gure helburu nagusia berau finkatzea da».

Proba 09:00etan hasiko dute Mendatan eta eskualdeko eskuin ibarreko hainbat herritatik igaroko dira txirrindulariak.

Bi ibilbide aukeran

Bi ibilbide izango dira, aukeran. Bata 35 kilometrokoa izango da eta gainditu beharreko malda 1.100 metrokoa. Ibilbide horretan lurzorua 10 kilometrotan harri koskor-pista izango da eta beste 19 kilometro baso-pistetan zehar.

Ibilbide horrekin nahikoa izan ez dutenek jarraian beste 40 kilometroko ibilbidea egin dezakete. Horrela, guztira 75 kilometro egingo dituzte mendi-bizikletan gainean. Proba luzea egingo dutenek 1.400 metroko malda gainditu beharko dute.

Antolatzaileek esan dutenez, bizikleta proba bukatu ostean, 15:00ak aldera, herri bazkaria egingo dute Mendatako frontoian. Bazkarira antolatzaile lanetan ibili direnak, proba joka duten txirrindulariak eta probako laguntzaile guztiak gonbidatu dituztela baieztatu dute.

Bizikleta barik ere bai

Nahi izanez gero, Mendatako BTT zentroan mendi bizikletak alokatzeko aukera egongo dela gogorarazi dute antolatzaileek. Horrela, baten batek bizikleta ez badauka ere martxan parte hartu ahal izango du.