Busturialdeko Hitza

Ieup! Gazte Asanbladak, Antzerki Eskolak, Lilibertsok, Busti Irratiak, Iparragirre Musika Elkarteak eta Trinkete antitxokoak egindako deialdiari erantzunez, ehun gazte inguru batu ziren atzo arratsaldean Seber Altube auditorioan. Agerraldiaren helburua, Astrak utzitako hutsunea betetzeko gazteek eurek gestionatutako espazio baten beharra aldarrikatzea. Gernika-Lumoko udaleko ordezkari politiko guztiei «lehenbailehen beharrezko neurriak eta erabakiak» har ditzatela eskatu zieten, orain urte erdi Astran egiten zituzten «jarduera guztiak aurrerantzean ere egin ahal izateko».

Izan ere, urte hasieran Astran egiten ziren jarduerak etetea erabaki zuten, karga-probek utzitako emaitza ezkorrak jaso ondoren. «Dagoeneko urte erdi kalean, eta euri asko», diote. Jose Mari Gorroño alkateak Astraren eraikina konpondu arte Pasealekuko eskoletan lekua izango zutela agindu ziela, «baina hitza bete ez» duela salatu nahi izan dute gazteek. «Promesa bat eta beste bat».

Lokalen beharrizana

Pasealekuko lokalak hutsik geratu ostean, horien erabilera zehaztu gabe dago oraindik. Gazteen iritziz, ordea, eurek badute lokal horiek erabiltzeko beharrizana. «Ezin dugu gehiago itxaron», esan zuten atzokoan. «Antzerki-eskolakoak kalean ibili dira entseatzen; kalean, kultur etxean ez dutelako leku nahikorik. Busti irrati libreak lokal bat alokatu behar izan du. Ikastaro berriak bertan behera utzi behar izan dira. Iparragirre Musika Elkartearen lokalean ez dira talde gehiago sartzen. Lilibertsokoekin beste horrenbeste gertatzen da. Eskaladarako bulderra desmuntatuta dago. Kontzertuak, hitzaldiak, erakusketak...».

Guzti hori kontuan hartuta, gaztetxe baten beharrizana egon badagoela aldarrikatu zuten auditorioan batutakoek. «Elkartzeko, autogestiorako, antzerkirako, partekatzeko, dantzarako, irratirako, sormenerako... Astran egin ahal genuena egiteko. Lekua. Orain. Eta Pasilekuan benetan ezinezkoa bada, bestelako espazio bat beharko dugu, baina, atoan».

Euren esanetan, jarduera sozial eta kulturalak egin gura dituen gazte «belaunaldi oso bat azpiegitura publiko barik dago, espazio erreferentzialik gabe».

Beste alde batetik, Bizkaiko Ahaldun Nagusi Jose Luis Bilbaok Guggenheimaren atal berria Urdaibain egin nahi dutela esan ostean sortutako adierazpenak kritikatu zituzten gazteek. «Azken asteotan hainbat aldiz agertu dira Astrari buruzko berriak komunikabideetan. Albiste horietako batek ere ez du aipatu Udalak Astrako taldeentzat kokaleku berria aurkitu duenik». Hori dela eta, euren jarduna eta euren etorkizuna politikoen eskuetan ezin dutela «usteltzen utzi» azpimarratu zuten bertara bildutakoek.

Batzordea, «seriotasunez»

Joan den martxoan ere atzokoaren antzeko eskaria egin zuen Astrako koordinadorak, zenbait talde politikoren jarrera gaitzeztearekin batera. Hain zuzen ere, «Astran burutzen ziren ekintzak bertan behera uzteko eskatu zuten presa berdina» izatea eskatu zieten udal talde politikoei, baita batzordea «seriotasunez hartzeko exijitu» ere.

«Azken bi urteotan desberdinon artean eta modu parte-hartzaile baten bitartez eraiki duguna ez dugu politikoen esku usteltzen uzteko asmorik», esan zuten. «Astra proiektua babestea eta aurrera eramatea beharrezkoa» dela ere azpimarratu zuten orduan.