Busturialdeko Hitza

Udalak eta Euskararen Gizarte Erakundeen Kontseiluak sinatutako hitzarmena hasi da fruituak ematen. Datorren zapatuan, hilaren 5ean, `Euskaraz bai´ ziurtagiria eskuratuko dute euskararekiko konpromisoa hartu duten zenbait komertziok, elkartek eta profesionalek. 29 entitate dira, oraingoz, ziurtagiria lortu dutenak, «lehenengo urtea izateko asko», Idoia Fernandez Euskara zinegotziaren iritziz. Hori dela eta, «balorazio positiboa» egin du Fernandezek.

13:30ean izango da ekitaldia, Merkatu plazan. Aitzol Zubizarreta ariko da aurkezle lanetan, eta ondoren Ekain Ormaetxea Kultura zinegotziak eta Rober Gutierrez Ziurtagirien elkarteko zuzendariak hitza hartzea aurreikusten dute. Ostean, banan-banan jasoko du entitate bakoitzeko ordezkariak dagokion ziurtagiria eta dokumentazioa, hartu duten konpromisoaren erakusgarri. Banaketa egiten den bitartean gaffitilari batek ekitaldiaren irudikapena egingo du.

Abendura arteko epea

Ziurtagiria lortzeko bidean entitate bakoitzaren maila aztertu dute lehenbizi. Ziurtagirien elkartekoak oso zorrotzak direla dio Fernandezek. «Maila batetik bestera igarotzea oso-oso zaila da. Goi mailako ziurtagiria lortzea, esaterako, izugarrizko kalitatea erakustea da».

Urtea amaitu orduko, dena den, beste zenbait entitatek lor dezakete ziurtagiria. Izan ere, abendura arteko epea eman dute prozesua gauzatzeko. «Lan eskerga eskatzen du eta batzuk ezin izan dute egin oraindik, Aita Villasante Udal Euskaltegiak edota Seber Altube ikastolak, esaterako. Euren asmoa da, ordea, urtea amaitu baino lehen ziurtagiria eskatzea».

Zapatukoa bezalako ekitaldirik, dena den, ez dute berriz egingo. «Euskara sailaren asmoa urtea amaitu baino lehen zigilua lortzen duten gainontzeko entitateak batzea da argazkiren bat ateratzeko. Horrez gain, triptiko batzuk aterako ditugu, herritarrek jakin dezaten konpromiso hori zeintzuk hartu duten».

Kalitateko zigilua

Ziurtagiria eskuratzeko 90 euroko urteko kuota ordaindu beharko dute akordioarekin bat egiten dutenek. Aurten, hitzarmena sinatzen duten lehenengo aldia izanik, Udalak hartuko du bere gain zigilu bakoitzaren kostuaren %30a.

Euskara zinegotziaren esanetan, «azken finean, kalitateko zigilu bat da ziurtagiria. Beraz, kanpora begira erabili dezakete lortu dutenek. Kalitatearen ideia hori herritarrei ematen zaien zerbitzuan zentratu nahi dugu. Guretzat, zerbitzu kalitatea da zerbitzua euskaraz ematea».