Busturialdeko Hitza

Gasolioaren prezioaren etengabeko igoeraren aurrean arrantza sektoreak bizi duen krisia salatzeko, ehunka arrantzaleren manifestazioa izan zen atzo eguerdian Madrilen (Espainia), Ingurumen, Landa Ingurune eta Itsas Inguruneko ministerioaren aurrean. Bertan izan ziren Bermeoko eta, orokorrean, Euskal Herriko arrantzaleak ere, `Arrantza salba dezagun´ eta `Konponbideak berehala´ zekartzaten pankarten artean.

Krisi horren aurrean Espainiako Gobernuak neurririk hartu ez duela salatu zuten. Hori dela eta, gasolioaren prezioaren igoera eta arrainaren lehen kotizazioen jaitsiera arinduko dituzten neurriak hartzea aldarrikatu zuten.

Cepesca Arrantzaren Espainiako Konfederazioaren eta arrantza sektorearen defentsarako plataformak 20.000 kilo arrain fresko banatu zituzten ministerioaren aurretik igaro zirenen artean. Txitxarroak, lirioak eta legatzak banatu zituzten, besteak beste, arrantzatzen duten produktuaren kalitatea erakusteko.

Azken bost urteetan gasolioaren prezioa ikaragarri igo dela, baina hogei urtetan arrainaren prezioa igo ez dela salatzen dute arrantzaleek. Jakinarazi dutenez, «2003ko maiatzean gasolioaren litroa 0,18 eurotan zegoen eta egun 0,75 eurotan dago litroa. Aurtengo urtarrilean gasolio litroko 0,42 euro pagatzen baziren, orain, 0,75 euro litroko kostatzen da gasolioa».

Euskal Herriko ordezkaritzak erregaiaren prezioa 0,75 eurotik 0,45 eurora jaistea eskatu du, «itsasora ateratzea errentagarria izan dadin».

Lanuzteak

Atzoko manifestazioaz gain, arrantzaleak greban daude dagoeneko. Batzuek atzo hasi zuten greba, baina zenbait autonomia erkidegoetako armadoreek eta arrantzaleek duela egun batzuk erabaki zuten etxean gelditzea.

Hala ere, zenbait euskal arrantzalek euren desadostasuna erakutsi dute «armadoreek arrantzaleekin berba egin barik arrantza etenaldia egiteko erabakia hartzeagatik». LABek ere hori salatu berri du.