Busturialdeko Hitza

Asteotan eskualdeko beste zenbait ikastetxek egin bezala, Eskolako Agenda 21 Udal Foroa egin zuten atzo Bermeon, bigarrenez. 10:00etan batu ziren lau ikastetxeetako ikasleen ordezkariak, irakasleak eta zenbait guraso urtean zehar egin izan duten lana partekatzeko eta Bermeoko alkateari eta udaleko zenbait ordezkariri beren lanaren aurkezpena egiteko.

Guztira, 1.823 ikasle bermeotarrek parte hartu dute aurten Eskolako Agenda 21ean. Institutuko, Sagrado Corazon ikastetxeko, Eleizalde ikastolako eta San Frantzisko herri ikastetxeko ordezkariek urtean zehar hartutako konpromisoak aurkeztu zituzten, eta horien betetze maila zein izan den azaldu zuten. Horrez gain, aurrera begirako erronkak ere azaldu zituzten.

Egindako proposamenak

Ikastetxe guztiek beren proposamenak bateratu ostean, garrantzitsuenak azaldu zizkioten Bermeoko alkateari. «Artza koipeztua noiz arte?», galdetu zioten. Horretarako lanean dabiltzala eta datorren urtearen amaieran proiektu horrekin hasiko direla erantzun zien Lejarretak. Bestalde, txakur kaken gaineko neurriak hartzeko eskatu zioten ikasleek Udalari. Alkatearen esanetan, «eskatuta daude txakurren kakak biltzeko poltsak». Autoak gaizki ez aparkatzeko neurriak hartzeko, edukiontziak sarriago husteko eta Garbigunea herritik hurbilago edo Garbigune gehiago jartzeko ere proposatu dute ikasleek.

Ikasleen konpromisoak

Ikastetxe bakoitzeko ordezkariek beren ikastetxeek aurrerantzean hartuko dituzten konpromisoak azaldu zituzten. Ikastetxe guztiek hartu dute «ahalik eta paper gutxien erabiltzeko konpromisoa, gutxi erabilitakoa berrerabili» egingo dute eta birziklapena bultzatuko dute «aspektu guztietan», euren arabera.