Busturialdeko Hitza

Foruan gune komertzial bat egiteko eskaera Eroskik 2006an egin zuela zehaztu zuen Igor Duñabeitia Foruko alkateak atzo emandako prentsaurrekoan. Eta horri erantzuteko Udalak Foruko hiri-plan orokorra aldatzeko asmoa duela gaineratu zuen. «Hori bai, Eusko Jaurlaritzak jartzen dituen arauak betez».

Eusko Jaurlaritzako Industria, Merkataritza eta Turismo sailak jarduera ekomomiko ezberdinetarako eskualde bakoitzean zenbat metro koadro erabil daitezkeen zehazten du. «Eskualde honetan 5.900 metro koadro ditu zehaztuta Jaurlaritzak merkatalguneentzako. Eta, oraingoz, 2.800 bakarrik daude okupatuta, Gernika-Lumoko Maxi Eroskirenak». Beraz, 3.100 metro koadroko merkatalgunea eraiki daitekeela esan zuen. «Arropa dendetarako, aldiz, mila metro koadro baino gehiago daude erabilgarri, eta brikolajea deritzonerako zazpiehun».

Gaur egun Gernika-Lumok onartuta duen hiri-plan orokorraren arabera, Maxi Eroskik ezin ditu bere instalazioak handitu. «Horregatik, euren asmoa da Gernika-Lumokoa zarratzea eta Foruan berria eraikitzea».

Proiektua hastapenetan

Foruko hiri-plan orokorraren hasierako fasea onartuta dutela ere zehaztu zuen. «Behin-behinekoa onartu beharko litzateke ondoren, eta, azkenik, behin-betikoa».

Lursailen jabeekin ere batzartu da Foruko alkatea. «Batzar horretan lursailak saltzeko prest agertu ziren ia denak». Gainera, ¬alkatearen esanetan¬ inork ez dio proiektuarekiko desadostasuna adierazi.

Horrez gain, merkatalgunearena hastapenetan dagoen proiektua dela zehaztu zuen. «Dena den, ez litzateke merkatalgune erraldoia izango, komunikabideek eta Gernika-Lumoko merkatariek esan duten legez». Dimentsio txikiko zentroa izango litzatekeela zehaztu zuen.

«Interes-gatazka»

Bestalde, gai horren harira sortu den eztabaida salatu zuen Foruko alkateak. «Gernika-Lumoko merkatariak kanpaina zizkina egiten ari dira, eta lotsagarria iruditzen zait». Foruak ere merkataritzarako proiektu bat duela esan zuen, eta berau mahai gainean jartzea besterik ez dutela egin.

«Gure proiektuak lanpostuak galtzea ekarriko lukeela diote. Baina gobernu talde honek hamahiru urte daramatza lanean, eta urte horietan herrian ez da lanpostu bat bera ere galdu. Are gehiago, Rinderrek gehitu egin ditu bere langileak, eta harrobia ere hazi egin da eremuari eta langile kopuruari dagokionez».

Horrez gain, Merkatarien Elkarteko presidentea den Begoña Larriba Gernika-Lumoko Merkataritza eta Turismo zinegotzia ere badela azpimarratu zuen Duñabeitiak, eta «influentzia-trafikoa eta interes-gatazka» eman daitekeela. Horregatik, erantzukizunak eskatu dizkio Gernikako Udalari.

Kartelak kentzea eskatu

Hori bakarrik ez, «Foruko alkateari irain eginez» Gernikako zenbait dendetan jarri dituzten kartelak kentzea ere eskatu zuen Duñabeitiak. Merkatari Elkartuak-eko presidentearekin eta merkatariekin batzeko arazorik ez duela ere esan zuen. «Apirilaren 29an Larribarekin batzartu nintzen, eta informazioa eman nion. Gainera, sor daitezkeen arazoak eztabaidatzeko batzartu gintezkeela esan nion».

Aurrerantzean ere, bai Gernikako Udaleko ordezkariekin zein merkatariekin batzartzeko borondatea agertu zuen Duñabeitiak.