Busturialdeko Hitza

Udalaren babesarekin, Gautegiz Arteagako Gazte Elkarteak eskualdeko lehenbiziko pop-rock lehiaketa antolatu du, `Busturialde Rock´ izenburupean. Parte hartu nahi duten taldeek gutxienez bi kanta dituen maketa aurkeztu beharko dute udaletxean, uztailaren 20a baino arinago.

Gazte Elkarteak jakinarazi duenez, aurkezten diren taldeen kanta originalak baino ez dituzte onartuko, hau da, musikak zein letrak taldeak berak asmatutakoak izan beharko dute, derrigorrez. Pop eta rock generoak landu ahal izango dituzte parte-hartzaileek eta letren gaia aukeratzeko askatasun osoa izango dute.

Josu Mendiola Gazte Elkarteko kidearen esanetan, «ideiak harrera ona izan du momentuz. Albistea oraindik zabaldu barik egon arren, dagoeneko apurka-apurka maketak heltzen hasi dira udaletxera. Lehiaketa ezagutzera ematen doan heinean partaidetza ere handitzen joatea espero dugu».

Zortzi talde finalista

Antolatzaileek iragarri dutenez, uztailaren 20a baino arinago aurkezten diren lan guztiak hartuko dituzte kontuan eta, horietatik, epaimahaiak zortzi finalista aukeratuko ditu abuztuaren 29an Gautegiz Arteagako plazan 21:00etan hasiko den zuzeneko kontzertuan parte hartzeko. Beraz, izena ematen duten guztiei antolatuko duten emanaldi horretan parte hartzeko konpromisoa eskatzen diete antolatzaileek.

«Lehiaketaren helburua musika talde hasiberriei aukera bat ematea da. Behintzat, finalistek eskualdean oihartzuna izango dute, eta sarien palmaresa handitzeko aukera ona dela uste dugu»

Izan ere, finaleko kontzertuan talde bakoitzak 30 eta 45 minutu arteko emanaldia egiteko aukera izango du. Epaimahaiak musikaren kalitatea, taldeak prestatzen duen espektakulua eta euskararen erabilpena baloratuko ditu.

«Ideia sortu zenean ez genekien deialdiak eskualdetik kanpo oihartzuna izan zezakeenik, baina azkenean lehiaketan parte hartzeko aukera Euskal Herri osoko talde hasiberri guztiei zabaltzea adostu genuen, Busturialdera bakarrik mugatu barik».

Antolatzaileek jakitera eman dutenez, taldeen agerraldiak antolatzeko finalaren egunean 12:00etan egingo dute zozketa eta bataren eta bestearen saioen artean hamabost minutuko atsedenaldia egingo du epaimahaiak ikusitakoa baloratzeko .

Era berean, musika-tresnen erabilpena askea izango da, bateria izan ezik. Izan ere, lehiaketaren oinarrietan argi uzten dute bateria finkoa izango dela eta talde guztiek berdina erabili beharko dutela derrigorrez. Gainontzeko tresnen erabilpena, esan bezala, taldeen esku utziko dute.

Dirusariak eta bidaiak

Sarituen izenak abuztuaren 30ean jakinaraziko ditu epaimahaiak. Hala ere, finalera heltzen diren talde guztiek 120 euroko saria jasoko dute, gutxienez.

Irabazleak, ordea, 1.000 euroko dirusaria eta zortzi lagunentzako asteburu bateko egonaldia Nafarroako landetxe batean lortuko ditu. Bigarren eta hirugarren postuan gelditzen direnek, ordea, 600 eta 400 euroko dirusariak jasoko dituzte, hurrenez hurren. Horrez gain, talde irabazleak bezala, ezaugarri bereko egonaldia irabaziko dute bigarren eta hirugarren sailkatuek.

Lehenengo edizioa

«Ideia lagunen artean sortu zen, eta Kultura Batzordeko batzarrean aurkeztu genuenean proiektua oso garatuta zegoen dagoeneko. Kartelen zirriborroak eta lehiakeraren oinarriak prest genituen. Lan guzti hori ikusita, Batzordeak hasiera-hasieratik hartu zuen bere gain proiektua bultzatzeko ardura», argitu du Mendiolak.

Lehiaketaren lehenbiziko edizioan, esan bezala, Euskal Herri mailan duen harrera neurtzeko erabiliko du egitasmoa Kultura Batzordeak. «Aurten antolatu dugu lehenengoz, beraz, oraindik ezin dugu aurreratu datorren urtean errepikatzeko aukera izango dugun. Harrera ona izanez gero, saiatuko gara sari hobeak ematen».

Esan bezala, `Busturialde Rock´ musika lehiaketan izena emateko epea dagoeneko zabalik dago eta uztailaren 20ra bitartean luzatuko da. Maketak Gautegiz Arteagako udaletxean entregatu beharko dira.