Busturialdeko Hitza

Ajangizko Udalak eta Eusko Ikaskuntzak hitzarmena sinatuko dute datorren barikuan, maiatzaren 30ean, hurrengo urteetan herriko toponimia eta etnolinguistika ikertzeko beka bi emateko.

Lehenengoak Ajangizko toponimia biltzea izango du helburu. Bigarrenak, aldiz, herriko etnolinguistika biltzea izango du helburu, eta 2009 urtean zehar emango dute. Beñat Erezuma zinegotziak «aurrekontu arazoak direla-eta dena urte berean egitea ezinezkoa» dela aipatu dio BUSTURIALDEKO HITZAri.

«Herriko Toponimia eta etnolingustika biltzeko eta ikertzeko beharra ikusi genuen Kultura Batzordean», dio Erezumak. «Eta Udalean Eusko Ikaskuntzaren proposamena hartu genuenean hitzarmena sinatzea eta aurrera egitea erabaki genuen».

Bekak «etorkizunerako lan bat eginda utziko» duela ere aipatu du Erezumak. «Herriko leku izenak eta bertoko berba bereziak biltzea garratzitsua da etorkizunerako». Lana txukun egin ahal izateko herriko jendearen laguntza ezinbestekoa izango dela azpimarratu du.

Toponimia biltzea helburu

Eusko Ikaskuntzak emango du beka, eta proiektu irabazlea aukeratzen den momentutik aurrera sei hilabeteko iraupena izango du. Bekaren zenbatekoa 4.000 eurokoa izango da.

Hautagaiek Euskal Filologia ikasketak eginda izan beharko dituzte edo, bestela, egin beharreko lanaren arloan esperientzia dutela frogatu beharko dute. Eskaria bakarka nahiz taldeka aurkeztu daiteke. Hautagaiek Eusko Ikaskuntzako kide izan beharko dute edo, gutxienez, lana hasterako kide izateko eskaera luzatuta izan beharko dute.

Beka eskatzeko beharrezko dokumentazioa

Ajangizen edo inguruko herrietan erroldatutako hautagaiek lehentasuna izango dute, beti ere. Lana Udalaren eta Eusko Ikaskuntzaren ardurapean egingo da Euskaltzaindiaren `Toponimia txikia arautzeko Irizpideen´ arabera, eta berak izendaturiko gidaritzapean.

Bekaren eskaera, horretarako bereziki prestatutako inprimakietan egin beharko da eta ezinbestean ondorengo dukumentazioa barnebildu beharko du: hautagaiaren edo hautagaien eskabidea NANaren fotokopiarekin batera, alde batetik, eta, egin beharreko lanaren txosten zehatza, bestetik. Lan egitaraua, erabiliko den metodologia eta proiektuaren laburpena, helburuak, gaiaren aurrekoak eta egungo egoera aztertu beharko ditu txostenak. Gehienez ere hamar orriko informazio osagarria gehitu daiteke.

Eskualdeko toponia bilketa

Dokumentazioa eta eskabidea aurkezteko epea 2008ko ekainaren 23an bukatuko da eta Eusko Ikaskuntzako edozein bulegotan utzi beharko da. Eskabideak eta dokumentazioa posta elektronikoz ere bidali daitezke `bekak@eusko-ikaskuntza.org´ helbidera. Edozein zalantza argitzeko ere helbide berera idatz dezakete interesdunek.

Ajangiz ez da toponimia aztertuko duen eskualdeko herri bakarra. 2006. urtean oraindik martxan jarraitzen duen proiektua abiatu zuten Ibarrangeluko eta Gautegiz Arteagako udalek beraien herrietako toponimia biltzeko.

Bermeoko Udalak ere 2007ko otsailean zazpi urtetako lanaren emaitza den Bermeoko toponimia biltzen duen liburua argitaratu zuen.

Gernika-Lumoko Udalak ere 2008ko urtarrilean herriko toponimia barnebiltzen duen mapa argitaratu zuen, herritaren artean kaleen eta lekuen izenak zeintzuk diren ezagutarazteko eta egiten diren okerrak zuzentzeko asmoz.