Busturialdeko Hitza

Joan den eguaztenean Muxikan egin bezala, atzo egin zuten Eskolako Agenda 21 Udal Foroa Busturiko udaletxean. 10:30ean hasita, Jose Maria Uzelai ikastetxeko bost eta seigarren mailako hamabost ikaslek egin zuten aurkezpena. Ikasleez gain irakasle, zuzendaritza talde, jantokiko langile eta gurasoen ordezkariak ere osoko bilkua aretora hurbildu ziren.

Busturiko herri eskolak eta Udalak aurten sinatu dute Eskolako Agenda 21 konpromiso akta. Ikastetxeko ordezkariek beraiek hartutako konpromisoen betetze maila aztertu zuten, eta baita aurrera begirako erronkak azaldu ere. Eskolako Agenda 21a aurrera eramateko, taldea indartzeko, eskolan bilketa selektiboa egiteko eta papera zein plastikoak birziklatzeko konpromisoa azaldu zuten ikastetxeko ordezkariek.

Herri mailako foroa abian

Udalari egindako eskarien artean, pilak biltzeko edukiontziak jartzea, eskolako patioa eta eliza ingurua gutxienez astean behin garbitzea eta bilketa selektiborako edukiontzi gehiago jartzea izan ziren.

Tokiko Agenda 21eko diagnostikoa eta lehen ekintza plana 2005ean egin zuen Busturiko Udalak. Egindako lanari jarraipena egin eta aurrera begira ekintza plana zehazteko, Udalak batzar batera deitu ditu herriko elkarte eta ostalariak. Batzarra atzo egin zuten, 19:00etan, Altamirako kultur etxean.

Roberto Lartitegi alkatea pozik agertu da Eskolako Agenda 21 Udal Foroan ateraratako ondorioek herri mailan egin beharreko ekintza planerako ekarpen zehatzak proposatzen dituztelako .