Busturialdeko Hitza

Bermeoko Udalak Itxas Gane futbol zelaian hobekuntza lanak egingo ditu udan. Oraingo honetan aldagela nagusiak berriztuko dituzte.

Pasa den astean Hirigintza Batzordean onartu ostean, hurrengo asteetan adjudikatu dute proiketua. Horrela, Bermeoko Udalaren asmoa berritze lanekin «hainbat arinen» hastea da. Izan ere, hurrengo denboraldia irailean hasten da eta ordurako lanak bukatuta izatea espero dute.

Aldagela gehiago

Iaz belar artifizialeko zelaian kokatuta dauden aldagelak berriztu zituzten. Aurten ordea, aldagela nagusiak goitik-behera berriztuko dituzte. Jon Goitia Bermeoko Udaleko teknikariaren esanetan, «aldagela nagusiek hezetasun arazoak dituzte eta nahiko egoera txarrean daude. Horrez gain, aireztapen sistema ere ez dabil». Hori dela eta, arazo guzti horiek konponduko dituzte eta, bide batez, aldagela barrua ere berrantolatuko dute.

Lau aldagela daude, eta guztira 450 metro koadro dituzte. «Lekua txiki geratzen zaiela esan ziguten futbol club-ekoek», adierazi du Xabier Legarreta Bermeoko alkateak. Hori dela eta, berritze lan horietan lau barik sei aldagela egingo dituzte. «Horrez gain, nesken talde bat sortzeko asmoa dutela esan digute, eta azpeigitura egokirik ez zituztelako orain arte ezin izan dutela egin», gaineratu du Legarretak.

Aldagela nagusiak goitik-behera aldatzeaz gain, kafetegi inguruko zoladura ere aldatuko dute. Aldagelen goiko aldea da, eta hezetasuna dela-eta arazo asko sortu dira.

Lan guzti horien kostua 460.660 eurokoa izango da, eta irailerako prest izatea espero dute.