Busturialdeko Hitza

Bermeoko XIV. Arrain Azokaren bigarren eguna da gaur. Atzo eguerdian inauguratu zuten eta lehen egunerako jada hainbat bisitari izan ziren. Inaugurazio ekitaldian, besteak beste, Jose Luis Bilbao Bizkaiko Ahaldun Nagusia eta Gonzalo Saenz de Samaniego Eusko Jaurlaritzako Nekazaritza, Arrantza eta Elikadura sailburua izan ziren, Bermeoko alkateagaz batera ohiko zintaren ebaketan parte hartuz. Horiekin batera, Mundaka, Gernika-Lumo eta inguruko herrietako alkate eta ordezkariak izan ziren, azokari harrera berezia egiteko.

Inaugurazioa egin ostean, azoka jendez bete zen; gehienak erakustokiak bisitatu zituzten, eta beste batzuk jai giroan murgildu ziren. Hala ere, azoka egunetako jai nagusia gaurkoa da, herritar guztiak mahoiz jantzita kalera ateratzen diren eguna. Gainera gaurkoan hainbat ekimen izango dira: Urdaibaiko belaontzien estropada ikuskizuna, danborrada herriko zenbait txokok antolatuta, Eleizalde ikastolak antolatutako pintxo lehiaketaren sari banaketa...eta musika. Egun guztian zehar musika ez da faltako jai giroa alaitzeko. Azoka goizez zein arratsaldez zabalik egongo da, bai gaur eta baita bihar ere. Guztira, 31 erakustoki izango dira ikusgai.

Arrain gazituei zuzenduta dago aurten azoka, eta arrantza eta itsasoko munduaren irudi zabal bat erakutsi gura diete Bermeora hurbiltzen direnei.

Sareginen, neskatilen eta fardogileen aldarrikapena

Atzokoan `Geurien be bai´ egitasmoarekin bat egin duten 54 enpresa eta elkarteek euren lantoki eta elkarteetan euskara plana ezartzeko konpromisoa sinatu zuten, tartean BUSTURIALDEKO HITZAk. Bermeoko Kafe Antzokian izan zen ekitaldia.

Bertan eman zuten Hegaluze Saria ere, aurten Ilaski Serrano kazetariak hartu duena. Eta Bizkai Buru Peñak urtero Athletic-eko jokalari bati ematen dion saria ere eman zuten. Javi Martinezek hartu behar zuen aurten saria, baina ezin izan zuenez etorri, Jose Angel Iribar izan zen sari hori hartzearen arduraduna.

Bestalde, jende askoko ekitaldia zela aprobetxatuz, saregin, neskatil eta fardogileek euren eskubideak aldarrikatzeko prestatutako manifestua irakurri zuen bermeotar neskatil baten alabak.