Busturialdeko Hitza

Bermeoko XIV. Arrain Azokak gaur zabalduko ditu ateak. 11:00etan irekiko dituzte azokako erakustokiak eta hiru egunetan goizez eta arratsaldez zabalik izango dira (gaur eta bihar, 11:00etatik 15:00etara eta 16:30etik 21:00etara; etzi 19:00etan itxiko dituzte). Erakusmahaiak 11:00etatik zabalduta izango diren arren, azokaren inaugurazio ofiziala 12:30ean izango da. Ostean, 13:30ean Hegaluze Saria, Bizkai Buru Peñaren saria eta enpresetan `Geurien be bai´ euskara plana ezartzeko konpromisoen sinadura ekitaldia izango da Bermeoko Kafe Antzokian. Aurten, bost erakunde gehiagok bat egingo dute `Geurien be bai´ egitasmoarekin. Erakunde berriak Besalde Sahararen aldeko elkartea, Bermeoko Ehiza, Arrantza eta Tiro Elkartea, Barrueta Arte Elkartea, Kick Boxing Elkartea, Bermeoko Kafe Antzokia (Ezkerra produkzioak) eta Crearte dira. Bakoitzak arlo zehatz batean lan egiten duen arren, guztiek euskararen aldeko konpromisoak hartuko dituzte aurten.

Guztira, 54 enpresa eta elkarte

Urteak pasa ahala, gero eta gehiago dira `Geurien be bai´ hitzarmena sinatzen duten enpresa eta elkarteak. Gaur, guztira, 54 enpresa eta elkartek sinatuko dute. Horiez gain, Bermeoko Udalaren izenean Xabier Legarreta alkatea egongo da euskararen aldeko konpromisoa berresteko. Bermeoko Udalaren Euskara sailak 2004an jarri zuen martxan egitasmoa. Helburu nagusia Bermeoko arlo sozioekonomikoan eta elkarteetan euskararen erabilera bultzatzeko plana garatzea izango da. Egun, herriko kontserba-industria garrantzitsuenak, elkarte profesionalak, sindikatuak, kirol taldeak, kultur taldeak, txokoak, musika elkarteak eta kultur elkarteak ari diraparte hartzen euskararen aldeko planean, besteak beste.