Busturialdeko Hitza

Itsas ingurumenaren babesaz kezkatuta, Mundakako Udalak eta AZTI-Tecnaliak luza daitekeen bost urterako lankidetza hitzarmena sinatu zuten atzo. Hitzarmenaren izenpean izan ziren, Unai Rementeria Mundakako alkatea, Rogelio Pozo AZTI-Tecnaliako zuzendaria eta Adolfo Uriarte, AZTI-Tecnaliako merkatu zuzendaria.

Mundakako alkateak atzo esan zuenez, «Mundaka herri txiki bat izanik, bere olatuari esker oso ezaguna da. Surfa iturri dinamizatzilea da guretzat». Hori dela eta, hitzarmen horren bitartez, `Mundakako olatuaren´ ezagutza hobetuko duen jarraipen eta aholkularitza zientifikoa izango du Mundakako Udalak.

Horrela, hurrengo bost urteetan AZTI-Tecnalia Mundakako Udalaren agente zientifikoa izango da. «Gure herriarentzat oso garrantzitsua da beraiek gure agente zientifikoak izatea», adierazi du Rementeriak.

`Kostasystem´sistema

AZTI-Tecnaliak Mundakako itsasbazterraren kudeaketan eta ozeanografia arloan izan litezkeen proiektuak aurrera aterako ditu. Horretarako, `Kostasystem´ sistema erabiliko dute. Udalerriko gune estrategikoetan bost kamara jarri dituzte. Kamara horiek, hamar minuturo argazkiak ateratzen dituzte.

Kamarek aterako dituzten argazki horien bidez «hondartzen birsorkuntzaren, estuarioaren bilakaera morfologikoaren eta Laida eta Laidatxu hondartzen erabiltzaile kopuruaren jarraipena» egin ahal izango dutela adierazi zuen Adolfo Uriartek, AZTI-Tecnaliako Merkatu zuzendariak.

`Kostasystem´ aplikazioari esker, AZTI-Tecnaliak modu zehatzean ezagutu ahal izango ditu Mundakako hare barraren ezaugarriak eta bere jarraipena burutu ahal izango dute. Bestalde, Mundakako olatuen iragarpena egin ahal izango dute; olatuaren altuera, periodoa eta norabidea jakin ahal izango dituzte, besteak beste.

Euskal Autonomia Erkidegoan Mundaka izango da sistema berritzaile horretaz baliatuko den lehenengo Udala.

Interneten une oro

`Kostasystem´ aplikazioaren bitartez batuko duten informazio guztia edonoren esku izango da interneten. Mundakako Udalaren webgunean bertan ikusi ahal izango da (`www.mundaka.org´) edo `www.azti. es´ eta `www.kostasystem.com´ webguneetan.

Interneten bidez, Mundakako ezkerreko olatuaren ezaugarriak eta baldintzak ezagutu ahal izango dira munduko edozein tokitatik.