Busturialdeko Hitza

Arrantza sektoreak bizi duen krisiaren ondorioz, industriak eta haren baitan dauden zerbitzuek ere krisia bizi dute. Egoera horren aurrean eta beraien jarduera «aintzat hartzen ez delako» saregileek, neskatilek eta arrain fardogileek bizi duten «egoera soziolaboral kaskarraren aurrean» euren lanbideari duintasuna ematea eskatzen dute, saregileen kolektiboen, neskatilen eta fardogileen baldintza soziolaboralak hobetuz eta Kantauriko arrantza sektorea mantentzeko elkarlana bultzatuz.

Sektorearen etorkizunari begira

Horretarako, Euskadiko itsasertzeko Saregile eta Neskatilen Elkartearen ordezkariek, Ondarroako Neskatilen Elkarteak, Galiziako Redeiras Artesanas o Peirao Federazioak, sortzear dagoen Kantauriko Baxura Sareen Elkarteak eta Lastres-Asturiasko Redeirak adierazpen bat prestatu dute, eta dagoeneko Eusko Legebiltzarrean eta Madrilen ere aurkeztu dute. Manifestu horrekin dei egin gura diete Gobernu Autonomikoei, Tokiko Gobernuei, kofradiei eta sektoreko gainontzeko erakundeei, besteak beste, sektorearen etorkizunari heltzerako orduan diren kolektibo profesionaltzat har ditzaten eta jardueraren antolaketara bideratutako jarduerak bultza ditzaten, langileen errentagarritasuna areagotzeko eta lanbidearen belaunaldiz belaunaldiko errelebua bermatzeko.

Bestalde, portuetako azpiegituretan saregileen kolektiboari zuzendutako inbertsioak bultza ditzaten ere eskatzen dute. Sektoreari begira prestakuntza zehatz baterako lerroak bultza daitezen lortu gura dute.

Jubilazio pentsioa jasotzeko gutxieneko adina murriztea

Manifestua udaletxeetan ere onartua izan dadin, Bermeon hurrengo osoko bilkuran aurkeztuko dute.

Bestalde, bihar Arrain Azokaren Hegaluze Saria ematen dutenean, ekitaldian bertan sareginen, neskatilen eta fardogileen adierazpena irakurriko dute.

Adierazpen horren bitartez, Estatuko Gobernuari ere zuzentzen dira, saregileen lanbidea aitortzeko beharrezko neurriak gauza ditzan eta dagokion lanbide-prestakuntza bultza dezan.

Bestalde, euren lan baldintza «gogorrak» kontuan hartuz eta beraien «ondoezak lan gaixotasuntzat aitortuz», jubilatzeko pentsioa eskuratzeko gutxieneko adina murriztea eskatu gura diote Estatuko Gobernuari.

Azkenik, arrantza-tokien itxiera edota urtaroko gelditzearen ondorioz, diru sarrera barik eta kotizatzen jarraitzeko beharraz, babesteko beharrezko neurriak eskatzen dituzte.