Busturialdeko Hitza

Burmuineko kalteak dituzten bizilagunen beharrizanak asetu asmoz, Bizkaiko Foru Aldundiak pertsona horientzat bereziki prestatutako eguneko zentroa zabalduko du ekainean, Lurgorri auzoan. 2006. urtearen hasieran esleitu zion Udalak Aldundiari lokala eta, beharreko obrak eta izapideak egin ondoren, ekainaren bigarren hamabostaldian inauguratuko dutela aurreikusten dute.

Zentroa zein egun zehatzetan jarriko duten martxan, ordea, ez dute jakin zehazten Aldundiaren Gizarte Ekintza saileko arduradunek. Prentsa zerbitzuko Imanol Zuloagaren esanetan, «ekainaren 16rako dena prest izango dela uste dugu, hau da, egun horretarako langile guztiak dauden ikusi beharko dugu, zerbitzuak egiaztatu...». Inaugurazioa, beraz, aipatu datatik «egun gutxira» egingo dutela dio Zuloagak.

Hain zuzen ere, Lurgorriko errotonda ondoko etxebizitzen behean egongo da burmuineko kalteak dituztenentzako eguneko zentroa, eta hamabost bat lagunentzako zerbitzua emango du. Momentuz, hala ere, gutxi batzuek eman dutela izena diote Foru Alduntitik.

260 metro koadro

Gutxi gorabehera 280.000 euroko aurrekontua izan du Bizkaiko Foru Aldundiak zentroa egokitzeko. 260 metro koadro izango ditu denetara eta, besteak beste, logopedia zerbitzua eta gimnasioa izango dira erabilgarri. Horrez gain, erabilera anitzetarako guneak ere egingo dituzte, erabiltzaileei beharrezkoak dituzten asistentziak eta tratamenduak eskaini ahal izateko.

2006an hasi zituzten obrak eta urte horretan bertan amaitzea zen asmoa, baina atzerapen nabarmena izan dute azkenean. Bien bitartean, beste herri batzuetako zentroetara joan behar izan dute kaltetuek. Aldundiak eta Udalak bere garaian adostutakoaren arabera, gutxienez 25 urtean erabili ahalko du Foru Aldundiak Lurgorriko lokala, eta epe hori hori luzatzeko aukera izango du.

Zentroaren kudeaketa, aldiz, ez da ez Udalaren ezta Aldundiaren eskumena izango, irabazi-asmorik gabeko erakunde baten ardura izango baita gestioa. Hori bai, bertan egingo diren giza-asistentziako jarduera guztiak Aldundiak berak behatu edo ikuskatu beharko ditu.