Busturialdeko Hitza

Asteburu honetan ¬barikutik domekara¬ Bermeoko XIV. Arrain Azoka izango da Lameran. Aurten 31 erakustoki izango dira.

Atzo eguerdian egin zuten aurtengo Arrain Azokaren aurkezpen ofiziala BBKren Bilboko egoitzan. Xabier Legarreta Bermeoko alkatea izan zen prentsaurrekoa ematearen arduraduna, eta azokaren egitaraua eta nondik norakoak azaldu zituen.

Urtero arrain batek hartzen du protagonismoa azokan, eta aurten arrain gazituari buruzkoa izango da. Dagoeneko bokartari, legatzari, berdelari, atunari... zuzendutako edizioak izan dira.

Hasi dira, jada, arraina merkaturatzeko edo tratatzeko moduak ezagutarazten azokako bisitariei. Iaz arrain freskoaren ezaugarriak eman zituzten ezagutzera, eta aurten arrain gazituan oinarrituko dira.

Azokan enpresa ezagunenak herriko kontserberak badira ere, bakailaoari buruzko enpresak, hezkuntzako erakundeak, beste zenbait erakunde, itsaskiak eta ketuak lantzen dituzten enpresak ere izaten dira. Aurten, gainera, arrozkiak eta arrainarekin fideua egiten duten enpresak ere egongo dira azokan. Xabier Legarreta Bermeoko alkatearen esanetan, «hainbat esparrutako enpresak izango dira eta horrekin arrantza eta itsasoko enpresen irudi zabal bat eskaini gura da; izan ere, arrantza mundua ez da arraina bakarrik».

Hainbat ekimen

Arrantza mundua ezagutzera emateko Bermeon dauden hainbat baliabide erabiliko dituzte, hainbat ekimen antolatuz.

Besteak beste, urtero bezala, asteburuan zehar arrain salmentaren itxurak egingo dituzte Arrantzaleen Kofradia Zaharrean. Arrantzaleen Museoan arrantzari buruzko dokumentalak emago dituzte, Nautika Eskola bisitzeko aukera egongo da zapatuan eta domekan, urpeko zinearen zikloa izango da Nestor Basterretxea aretoan eta bertan Donostiako Urpeko zinemaldira aurkeztu diren pelikulak ikusi ahalko dira. Haur eta gazteentzat ere hainbat ekimen izango dira, azoka barruan eurentzako antolatutako txokoan. Eta bi itsasontzi izango dira ikusgai, Juan de La Cosa ospitale-ontzia eta Urdaneta itsasontzia. Bi horietara ere bisitak antolatu dituzte.

Azokaren inaugurazioa barikuan egingo dute. Erakustokiak 11:00etan zabalduko dituzte, baina 12:30ean izango da inaugurazio ofiziala. 13:30ean Hegaluze Saria eta Bizkai Buru Peñaren saria emango dituzte Kafe Antzokian, eta `Geurien be bai´ euskara plana enpresetan ezartzeko konpromisoak sinatuko dituzte.