Busturialdeko Hitza

Gernika-Lumoko ertzainek 34 urteko gizonezko bat (E.M.Q) atxilotu zuten herenegun arratsaldean Mungian, sexu delitua egitea leporatuta. Ertzainen arabera, atzemandako laguna gernikarra da eta ustez egindako erasoa Gernika-Lumon bertan gauzatu zuen joan den barikuan.

15:00ak aldera jazo zen erasoa barikuan, Ibarrako industriagunean. Emakumea oinez zihoan herriaren erdigunera bidean. Ertzaintzaren arabera, autoan zihoan gizona eta emakumearen ondoan gelditu ondoren, «bortizki» sartuarazi zuen auto barruan eta ikutuak egin zizkion. Emakumeak ihes egitea lortu zuen eta salaketa jarri zuen ertzain-etxean.

Mungian atxilotu zuten azkenean 34 urteko gizonezkoa, 19:30ak aldera, domekan. Gidatzen zuen autoa ezagutu zuten ertzainek eta merkatalgune baten aurrean aparkatu zuenean, identifikatu eta atxilotuta eraman zuten, bilatzen zeuden laguna zela ikustean. Epailearen esku dute ertzainek.

Abenduan beste atxilotu bat

Azken hilabeteetan behin baino gehiagotan izan dira sexu erasoak Gernika-Lumon. Joan den abenduan, esaterako, bost erasoren ustezko egilea atxilotu eta kartzelatu zuten, 23 urteko gazte bat. Pasa den astekoa bezala, hark egindako erasoak ere egun argiz izan ziren.

Egotzi zizkioten erasoetan lehenengoa 2006ko azaroan izan zen eta gainontzeko laurak, aldiz, 2007. urtean zehar. Biktimek egindako deskribapenak ezinbestekoak izan ziren atxiloketarako eta behin epailearen esku utzi ondoren, gaztearen berehalako kartzelatzea agindu zuten.