Busturialdeko Hitza

Amaia Aboitiz eta Nagore Beitia izendatu dituzte IV. Bertsopaper lehiaketaren irabazle. Amaia Aboitiz hamabi eta hamalau urte bitartekoen artetik eta Nagore Beitia hamalau eta hamazortzi urte bitartekoen artetik.

Sari banaketa atzo goizean egin zuten Nestor Basterretxea aretoan; bertan ziren ikastetxe guztietako ikasleak eta irakasleak. Hain zuzen, bertsopaper lehiaketa Euskara sailak herriko ikastetxeekin elkarlanean antolatzen duen ekimena da, oraingoa laugarren edizioa izanik.

Hamabi eta hamazortzi urte bitarteko gazteei zuzendutako lehiaketa da berau, eta «gazteen artean bertsozaletasuna sustatzea» du helburu». Hori dela eta, irabazleek ez ezik, parte-hartzaile guztiek jaso zuten saria atzoko ekitaldian, bertsozaletasuna lantzen jarraitzeko materiala, hain zuzen ere.

Aipamen berezia

Bestalde, maila bakoitzeko bigarren sailkatuak aipamen berezia jaso zuen. Lehen mailan (12-14 urte bitartekoetan), Irati Ortube izan zen bigarren saritua eta bigarren mailan (14-18 urte bitartekoetan), Aitor Beitia ¬irabazlearen neba¬.

Ekitaldia bertso saio bihurtu zuten. Alde batetik, Xabier Enbeita bertsolaria izan zen parte-hartzaileei eta irabazleei bertsoak kantatzen eta, bestetik, irabazleek euren bertsoak kantatu zituzten. Maite Alvarez de Zarate Euskara teknikariak eta Karmele Algorta Kultura zinegotziak ere ekitaldian parte hartu zuten, parte-hartzaileei sariak banatuz.

Ekitaldian falta zirenak lehiaketaren epaimahaikideak izan ziren: Ander Oleaga, Anertz Muniategi eta Igor Muniategi bertsolariak, lan kontuengatik ezin izan baitzuten bertan egon.

Aurten, lehen mailan bost lagun aurkeztu dira eta, bigarren mailan, ostera, iaz baino parte-hartze handiagoa izan da. Bigarren mailan lau lagun aurkeztu ziren 2007an eta aurten zazpi lagunek aurkeztu dute bertsoa.

Urtero gazteen artean bertsotarako zaletasuna bultzatzen ahalegintzen dira, ikastetxeen laguntzarekin, herriko gazteentzako horrelako ekimenak antolatuz.