Busturialdeko Hitza

Herenegun bildu zen CCOO sindikatua Urazca enpresaren lehiaketa administrariekin, eta azken horiek astebeteko epea eskatu dute enpresaren egoera aztertzeko. Datorren eguaztenean bilduko dira berriro. Hala ere, Bizkaian eraikuntza arloan sindikatu horretako idazkari orokorra den Iñaki Merinok esan duenez, «zor-agiriak kobratzea aztertzen ari dira, berriro lanean ahalik eta lasterren hasteko». Martxoan eta apirilean egindako obra batzuen zor-agiriak kobratuta zazpi milioi euro lortu ditzaketela jakinarazi zieten lehiaketa administrariek sindikatuari, herenegungo bileran.

Bestalde, enpresa bakoitzaren egoera zein den aztertu gura dute epe luzeago batean. Baita bakoitzaren bideragarritasuna ere. «Eraikuntza enpresa mantentzea da asmoa, batez ere Euskal Autonomia Erkidegoan, hemen baititu obra gehien». Hala ere, Merinoren ustez, posible da beste autonomia batzuetako delegazioak zarratzea.

Lanpostuak eta soldatak

Herenegun arratsaldean, bestalde, asanblada egin zuten CCOOren Bilboko egoitzan, eta bertan izan ziren Urazca enpresaren 200 bat langile. Beraien lanpostuengatik eta kobratu barik dituzten soldatengatik kezkatuta zeuden beharginak. Merinok azaldu duenez, «enpresak badu lehentasunezko kreditu bat langileentzako. Horrekin, maiatzaren 9ra artekoa ordaindu gura dute. Eta horren zati bat Fogasak (soldatak bermatzeko fondoa) hartuko luke bere gain». Maiatzaren 9tik aurrerakoetan, berriz, langileen soldatek ez dute lehentasunik izango.

Hala ere, enpresaren «benetako egoera zein den jakin arte» zer gertatuko den ezin dutela esan azpimarratu du Merinok. «Baina lanpostuak mantentzeko ahalegin guztiak egingo ditugu». Eraikuntza arloan langile asko daude behin-behineko kontratuekin, obra bukatu artekoak. «Horien kontratuak obra amaitutakoan etengo dira. Enpresak gero eta langile gutxiago izango ditu eta dirua aurreztuko du soldatetan».

Behin-behineko kontratuarekin dauden langileek ere berau bukatzea nahi dutela dio Merinok, egoera ikusita «enpresatik alde egin nahi baitute lehenbailehen».

Urazcak, hala ere, lanpostu finkoak bermatu beharko lituzke, CCOOren ordezkariaren iritziz, «eta lan egingo dugu hori hala izan dadin».

Dena den, inolako kaleratze espedienterik balego neurriak hartzearen beharra aztertuko luke sindikatuak. «Momentuz ez dugu inolako neurririk hartuko, ez baitugu egoki ikusten. Enpresak bere jarduna berriro hastea eta langileak lanera bueltatzea da orain lehentasuna».

Galdakaoko ospitaleko zuzendariagaz biltzeko zain

Gernika-Lumoko Udala, berriz, Galdakaoko ospitaleko zuzendariarekin bilera egiteko zain dagoela adierazi du Jose Mari Gorroño alkateak. Izan ere, erresoluzio handiko zentroa Galdakaoko ospitalearen menpekoa izango da. «Bilera egitea eskatu dugu, eta momentu honetan Galdakaoko ospitaleko zuzendariaren erantzu- naren zain gaude».