Busturialdeko Hitza

Domekan izan zen Urdaibaiko V. Piragua Ibilbidea. Bermeoko Kirol Patronatuko arduradunek adierazi dutenez, «iaz baino parte-hartzaile gehiago izan ziren. Hala ere, askok ezin izan zuten parte hartu, ez zituztelako eskatzen ziren baldintza guztiak betetzen. Antolatzaileetako batek, Mikel Egibarrek dioenez, «besteak beste, piraguak itsasokoak izatea eskatzen zen eta asko beste mota bateko piraguarekin etorri dira».

Horrez gain, ibilbidea aldatu behar izan zuten antolatzaileek. «Babeseko ontziekin arazoa izan genuen eta itsasoak ere ez zuen asko lagundu. Beraz, ibilbidea laburtzea beste irtenbiderik ez genuen izan», azaldu du Egibarrek . Izaro irlari buelta eman beharrean, portutik Ogoñorantz bideratu zuten lasterketa eta handik bueltan joan ziren berriro portura.

Herrian zaletasun falta

A lasterketan, federatuei zuzendutakoan, 25 lagunek parte hartu zuten. B lasterketan, herri lasterketa deiturikoan, berriz, 31 lagun izan ziren. Guztira, beraz, 56 piragua.

Itxaro Zabala Kirol Patronatuko teknikariaren ustez, «jendeari aukera ematen zaio beste ekimen batzuetan parte hartzeko, baina, piraguaren kasuan, herrian horrenbesteko zaletasunik ez dagoela ikusten da».

Mikel Egibarrek ere zaletasun edo jendearen aldeko interes horren falta nabari du. «Lan handia eskatzen du honelako jardunaldi bat antolatzeak». Egibarrek urteak daramatza piragua elkarte bat antolatzeko gogoagaz, besteak beste, Urdaibaiko Piragua Ibilbidea bezalako ekimenak antolatzeko, baina orain arte ez du jendearen aldetik interesik ikusi. «Ondoan itsasoa izanda eta bestaldean erreka, horrelako talde bat antolatzeko jenderik ez izatea tristea da benetan. Norbait interesatuta badago, utzi dezala bere izena eta kontaktu bat kiroldegian». Egibarrek datorren urtean berriro ezer antolatzen hasteko «indarrik ez» duela dio.