Busturialdeko Hitza

Aurtengo Erdi Aroko azokak izan duen arrakastak agerian utzi du Udalak orain bost urte lehenengoz antolatutako feria sustraituz dihoala urtez urte. Anayao elkarteak berak aitortu du «geroz eta indar handiagoa» daukala azokak Gernika-Lumon eta, kalkulu zehatzik oraindik egin ez duten arren, aurten Merkatu plazatik 25.000-30.000 bisitari artean igaro direla diote Anayaoko arduradunek. Udalak, aldiz, «marka guztiak hautsiz 35.000 lagun» kontabilizatu ditu azken edizioan. Kopuru bat zein beste izan, iazkoa erraz gainditu da aurten, 2007an 20.000 izan baitziren azokara hurbildu ziren lagunak.

Gerardo Martin Anayao elkartearen kudeatzailea pozik agertu da emaitzarekin. Dioenez, lehenengo eguna izan zen arrakastatsuena. «Bete-beteta zegoen Merkatu plaza, ez zen jende gehiagorik sartzen. Hurrengo egunetan pixka bat jaitsi zen bisitari kopurua, baina egiten dugun balorazioa oso ona da». Gauzak horrela, «bost edizioetan onena» aurtengoa izan dela gaineratu du Martinek. «Klasiko bat da dagoeneko jendearentzat. Harrera ezin hobea izan du».

Ez hori bakarrik, maiatzeko zubian antolatutako azoketatik «zalantzarik barik onena» ere Gernika-Lumokoa izan dela dio Anayaoko kideak. Azokak eta Feriak saileko zinegotzi Iñaki Gorroñok, bere aldetik, emaitza hori «lorpen handia» dela adierazi du. «Maiatzeko zubi honetan estatu mailan ospaturiko guztien artean arrakastatsuena izatea lortu dugu eta hori, dudarik gabe, lorpen handia da, harro sentitzeko modukoa».

Salmentak ere onak

Bisitari kopurua ez ezik, salmentak ere onak izan dira, Anayaoko kudeatzailearen esanetan. «Artisauekin aritu naiz hizketan eta saltzaile guztiak agertu dira oso pozik saldu dutenarekin. Baliteke amaren egunak ere zerikusirik izatea», dio.

Beste alde batetik, umeei zuzendutako ekitaldien artean arrakastatsuenak Erdi Aroko torneoetan oinarritutakoak izan direla aipatu dute.