Busturialdeko Hitza

Bizkaiko Foru Aldundiko Ingurumen saila, `La Caixa´-ko gizarte-ekintzarekin bat era, Bizkaiko naturguneak hobetzeko eta erabilera jasangarria bermatzeko lanean ari da. Hobekuntzak izan dituen lekuetariko bat Gaztelugatxeko San Juan izan da.

Aldundiak eta `La Caixak´ Bizkaiko naturgune babestuak kontserbatzeko eta kudeatzeko programa bat garatzeko hitzarmena sinatu zuten. Programa horretarako, iaz, `La Caixa´-ko gizarte-ekintza programak 400.000 euro bideratu zituen. Orain arte, hiru naturgune ukitu dituzte, Gaztelu- gatxeko San Juan barne, eta balio naturalak eta paisajistikoak babesten saiatu dira, besteak beste.

Oinezkoentzako sarbidea

Gaztelugatxeko San Juan biotopoa bisitatzen duten lagunek kontuan izanda, eta horiei sarbidea errazteko asmotan, Bakioko Eneperi taberna eta San Juan batzen dituen bidea egokitu dute. Izan ere, aldapa handia duen bidea da eta harriz eta basaz beteta zegoen.

Guztira, 345 metroko tartea hobetu dute oinezkoei erraztasunak emateko. Tarte hori atontzeko natura errespetatzen dituzten materialak erabili dituzte. Hain zuzen ere, harri irregularrak imitatzen dituen hormigoia bota dute eta egurrezko eta inguruko harriekin egindako mailak jarri dituzte bertan.

Oinezkoentzako sarbidea hobetzeaz gain, San Juan, Aketze eta Matxitxako itsasargia ikustea posible den behatokia jarri dute.

Bestalde, Gaztelugatxeko San Juan bisitatzen duten pertsonek informazioa eduki dezaten, egurrezko zenbait informazio panel jarri dituzte. Informazio panel horiek, biotopoaren inguruko landerediaren eta faunaren informazioa eskaintzen dute.

Hobetze lan guzti horiek egin ahal izateko 100.108 euroko inbertsioa egin dute Aldundiak eta `La Caixa´-k.