Busturialdeko Hitza

Urdaibain egiten diren ekintza turistiko guztiak batu eta horiek ezagutzera ematea du helburu Turdaibai elkarteak atzo Basondon (Kortezubi) aurkeztu zuen `Aktiba Zaitez´ programak. Horretarako, hainbat jarduera antolatu dituzte maiatzaren zubi honetarako: bisita gidatuak Basondon, Bermeoko `Hegaluze´ eta `Olatu´ ontzietan irteerak, kanoa-jaitsierak errekatik edota kayak-etan ibiltzen ikasteko ikastaroak, besteak beste.

«Familiei eta norbanakoei daude zuzenduta `Aktiba Zaitez´ programaren barruan antolatu ditugun ekintzak. Izan ere, orain arte eskaintza taldeentzako zen, eta gure helburua da familiek eta norbanakoek ere jarduera horietan parte hartzeko aukera izan dezaten», azaldu zuen Nerea Erezuma Turdaibai elkarteko presidenteak. Helburu horrekin, besteak beste, familiei zuzendutako tailer pedagogikoak antolatu dituzte asteburuetarako.

Urdaibaiko eskaintza Euskal Herrian eta Espainian zabaldu

Udazkenean beste jaialdi bat egiteko asmoa dutela azaldu zuen Erezumak. Eta ordurako Urdaibaiko eskaintza turistikoa Euskal Herrian eta Espainian zabaltzeko asmoa dutela gaineratu zuen. «Oraingo honetan ez da posible izan, baina hurrengorako eskaintza Gipuzkoara, Ipar Euskal Herrira eta gugandik gertu dauden Espainiako zenbait probintziatara zabaltzea da helburua».

«Potentziala badago»

Duela urtebete sortu zuten Urdaibain turismo jasangarria bultzatzea helburu duen Turdaibai elkartea. «Enpresen artean berba egin eta ohartu ginen ez genuela elkar ezagutzen. Hori dela eta, indarrak batzea erabaki genuen. Sentsazioa genuen Urdaibain turismoa ez zegoela garatuta, eta hemen potentziala badago».

Urte hau «gogorra» izan dela aitortu zuen; «Euskal Autonomia Erkidegoan ez baitago Turdaibai bezalako beste elkarterik». Baina balorazio positiboa egin du.

Horrez gain, Eusko Jaurlaritzak eta Bizkaiko Foru Aldundiak ondo ikusi zuten proiektua, eta lagundu egiten dute. «Guk gure aldetik ahaleginak egingo ditugu beraiekin ere gauzak egiteko».