Busturialdeko Hitza

Gaurtik domekara bitartean Paralinpikoentzako Bizkaiko XII. Biran ariko dira norgehiagoka munduko hamalau herrialdetatik etorritako 124 parte-hartzaile. Aurten Busturialdera etorriko dira, Ibarrangelun jokatuko baita gaur arratsaldean erlojuz kontrako probetako bat.

Txirrindularitzara egokitutako lau modalitateetako kirolariek parte hartuko dute Saiatu Fundazioak antolatutako biran: bizikleta, trizikloa, hand-bike-a eta tandem-a. Bost ibildibideko lau etapatan banatuta egongo da lasterketa. Gaur bertan abiatuko da, 10:00etan, Santurtziko kiroldegiko pistetatik. Arratsaldean, 16:30etik aurrera, Ibarrangeluko erdigunetik Kanalarainoko tartea egin beharko dute parte-hartzaileek, erlojuz kontra, Laga eta Laida hondartzetatik igaroz. Santurtzin jokatuko den atalean trizikloek eta hand-bike-ek soilik parte hartuko dute, baina Ibarrangelukoan modalitate guztietako kirolariak ariko dira nor baino nor.

10:00etan jarriko dira martxan berriro bihar goizean. Kasu horretan, kronoigoera egin beharko dute Zollora. Arratsaldean, 16:30ean hasita, 52 kilometroko ibilbidea egin beharko dute Mungiatik Mungiara.

Getxoko Fadura belodromoan izango da azken etapa, domeka goizean. 10:00etan hasiko da eta 1,2 kilometroko luzera duen abiadura proba burutu behar izango dute parte-hartzaileek.

Munduko osoko kirolariak

Nazioarteko zirkuituaren lasterketa garrantzitsuenen artean dago Bizkaiko Bira Paralinpikoa. Hori dela eta, munduko kirolari paralinpiko onenak izango dira gaur arratsaldean Ibarrangeluko errepideetan: David Stone, Mark Homan, Paolo Vigano, Jan Boyen, Rachel Morris, Maurice Eckard, Barbara Weisee, Darren Kenny, Antonio Garcia, Dirk Boon, Victor Garrido eta Juan Jose Mendez, besteak beste.

Horiez gain, Javier Otxoa eta Aitor Oroza euskaldunek ere parte hartuko dute. Aurten, gainera, Paracicling-eko euskal zirkuiturako proba puntuagarria izango da gaurko hau. Antolatzaileen arabera, dena den, datozen urteetarako erronka nagusia Euskadiko Bira antolatu ahal izatea da.