Busturialdeko Hitza

Maite Bolumburu eibartarraren lanak daude ikusgai eta salgai Nestor Basterretxea aretoan. Erakusketan, artistaren 31 lan ikusteko aukera dago.

Bere pinturetan paisaiak ikus daiteke gehienbat, hainbat herritakok. Urtaroek ere badute tokia Bolunburuk erakusten ipini dituen lanetan.

Hain zuzen ere, Bolumburuk azken bi urteetan egindako lanak daude egunotan ikusgai Nestor Basterretxea aretoan.

Hogei urte daramatza eibartarrak pinturan lanean, «urte guzti hauetan egindako lanak ezin ditut zenbatu, hemen azken bi urteetan egindako zenbait lan daude», azaldu du.

Lau aldiz izan da Bolumburu Bermeon. Lehenengo bietan udal liburutegian jarri zuen erakusketa, eta azken bietan Nestor Basterrretxea aretoan.

Argazkiak pintura bihurtu

Bidaiatzea gustuko duela aitortu du Maite Bolumburuk. «Bidaietan argazki asko ataratzen ditut, eta nire lanak egiteko argazki horietaz baliatzen naiz. Lehenengo eta behin, gaia pentsatzen dut, eta gero argazki horietan agertzen dena apurtzen saiatzen naiz, gero pintura hori oso fotografikoa izan ez dadin».

Bermeora etorri den bakoitzean hainbat lan ekarri ditu aurkezteko eta saltzeko. «Jendeak ez du gogoratzen aurreko urteetan zer ikusi duen, baina niretzako eta edozein artistentzat garrantzitsua da lan desberdinak aurkeztea».

Erakusketa domekara arte egongo da ikusgai, 18:00etatik 21:00etara.