Busturialdeko Hitza

Domekan egin zuten 2008ko ipuin lehiaketaren sari banaketa, Gautegiz Arteagako kultur etxean. Lehiaketa horretan hiru maila bereizi dituzte: 1. mailakoak (6-7 urteko umeak); 2. mailakoak ( 8-9 urtekoak) eta 3. mailakoak (10-11 urtekoak). Guztira 26 ipuin aurkeztu dituzte lehiaketara. Lehenengoan zortzi umek parte hartu dute, bigarrenean bederatzik, eta beste horrenbeste hirugarrenean.

Kultura batzordeko kideek osatu dute epaimahaia, eta aukeraketa egitea ez dela erraza izan adierazi dute. «Ziklo bakoitzeko lan bat saritu beharra zegoen, eta kostata baina azkenean aukeratu dituzte irabazleak».

Lehenengo mailan Garazi Foruria izan da irabazlea, `Toti eta Tito´ izeneko ipuinagaz. Bigarrenean Leire Gomezen `Zebra zuria´ ipuina aukeratu du epaimahaiak irabazle legez, eta hirugarren zikloan Irati Omagoieaskoaren ipuina saritu dute, `Berdel apoa´ izenekoa. Liburua eta CDa hartu zuten hirurek sari moduan, eta saria hartzeagaz batera, ipuina irakurri zuten ekitaldian batu ziren umeen eta gurasoen aurrean.

Sariak denentzako

Hala ere, gainontzeko parte-hartzaileek ere saria hartu zuten domekan. Hain zuzen ere, ipuin bana eman zieten antolatzaileek ipuin lehiaketan parte hartu duten ume guztiei.

Sari banaketa ekitaldiaren ostean txotxongilo ikuskizuna izan zen, kultur etxean bertan. Horrela, Ginol taldearen `Birusak erasoan´ antzezlanagaz gozatzeko aukera izan zuten umeek.

Euskara zerbitzuaren esku

Ipuin lehiaketara aurkeztu diren lanak euskara zerbitzuaren esku geratuko dira, eta horrek nahi duen erabilera emateko eskubidea izango du. Saritu gabeko lanak hilabeteko epean jaso ahalko dira.