Busturialdeko Hitza

«Bertoko produkturik freskoenakaz... Gazteszena!». Horrela laburbildu dute Iparragirre Musika Elkarteak, Trinkete Antitxokoak eta Ieup! Gazte Asanbladak datorren barikuan Lizeo Antzokian izango den ekitaldi berezia. Behinik behin, Gernika-Lumoko eta eskualdeko gazteen sormen lana taula gainera eroateko asmoa du egun horretarako prestatu duten Gazteszena izeneko jaialdiak.

«Musika, antzerkia, ikus-entzunezkoak, literatura, bertsolaritza, dantza... Asko eta askotarikoak dira Gernikako eta eskualdeko gazteon kultur adierazpideak», Gazteszenaren antolatzaileen iritziz. Ordea, «begibistako oparotasun horrek bidegurutzeak edota bat egiteko elkarguneak gutxitan aurkitzen» dituela diote, eta, beraz, hutsune hori betetzera dator aipatu hiru taldeek elkarlanean antolatu duten jaialdia.

20:00etan hasiko dira Gazteszenaren ekitaldiak, mota eta gustu guztietakoak, gainera. Bi ordu inguruz, hainbat izango dira gazteek Lizeoko oholtza gainera eroango dituzten proposamenak: dantzak, Segundo Olaeta Musika Eskolakoen konboa, zuzeneko telebista eta irrati emisioak, ikus-entzunezko lan laburrak, bertsolariak, bideoklipak, graffitia, Trinkete Anti-txokoko kartelen erakusketa, The Riff Truckers eta Young Talent Show taldeak...

Bost helburu

Antolatzaileen arabera, bost dira Gazteszenaren helburu nagusiak. Batetik, gazteen sorkuntza-lana eta soziokulturaren alorrean garatzen dituzten proiektuak ezagutzera ematea. Era berean, sortzen ari diren eta sor daitezkeen gazteen arteko harremanak sendotzea eta elkarrekintzarako baldintzak sortzea ere badu helburu.

Beste alde batetik, gazteen artean kultur eskaintza zabalagoa ahalbidetu nahi du Gazteszenak, baita ere gazteen lanak aintzatespen handiagoa izatea gizartean zein erakunde publikoetan. Azkenik, gazteon artean elkartegintzaren eta sorkuntzaren balioa sendotzea eta erakargarri egitea bilatzen du.

Nahiz eta antolatzaileen hasierako asmoa doako jaialdi bat egitea izan, azkenean hiru euro balioko ditu sarrerak. «Oinarrizko gastuak ordaintzeko», euren esanetan.