Busturialdeko Hitza

2009ko aurrekontuen osatze prozesua «parte-hartzaileagoa» izan dadin, Gernika-Lumoko ezker abertzaleak ekimen berritzailea jarriko du abian datorren astean. Hain zuzen, herritarren ekarpenak bilduko ditu hilabete osoan zehar, horretarako propio sortuko dituzten baliabideen bitartez. Horrela, telefonoa, posta elektronikoa edota leku publikoetan jarriko dituzten buzoi bereziak baliatuz, gernikarrek euren kexa, iradokizun zein proposamenak helarazi ahalko dituzte udalera.

Herritarrek aurrekontuen osaketan boza izatea da asmoa, «denok izatea parte hartzeko aukera», Idoia Fernandez Ezker Abertzalea Udal Taldeko bozeramailearen esanetan. Aipatu baliabideak medio, edozein proposamen egin dezakete herritarrek, «diru kopuru zehatzetan sartu beharrik gabe». Jai Batzordea eta Euskara Batzordea ere baliatu nahi dituzte horietan parte hartzen duten bizilagunen ekarpenak ere jasotzeko.

Proposamen guztiak bildu ondoren, udal gobernuak aurrekontuak prestatzeko egingo duen batzarrean aurkeztuko ditu ezker abertzaleak. «Geuk kudeatzen ditugun gaietakoak ez ezik, beste arlo batzuetakoak ere aintzat hartuko ditugu», dio Fernandezek. «Gure filosofiarekin bat datozenak defendatu egingo ditugu, baina ekarpen guztiak aurkeztuko ditugu, ados egon ez arren, denek aukera izatea baita asmoa». Halaber, proposamen xumeenak ere garrantzitsuak direla uste du ezker abertzaleko kideak. «Ekarpen guztiak izango dira ongi-etorriak».