Busturialdeko Hitza

Atzo iluntzean izan zen Gaztea Sarien banaketa ekitaldia Donostiako Victoria Eugenia antzokian. Berri Txarrak, Barricada, Nahiadance, Pereza eta eskualdeko Ken 7 taldea eta Fito Cabrales izan ziren sarituak.

Talde edo bakarlari oneneren atalean, Gari, Gose eta Ken 7 zeuden aukeran eta Euskadi Gazteako entzuleek Ken 7 nabarmendu zuten. Edurne Pasaban mendizaleak eman zion saria Busturiko, Gernika-Lumoko eta Mundakako kideez osatutako taldeari.

Kantu Onenaren sailean, berriz, Ken 7ren ’Noizbait’; Gariren ’Esperantzara Kondenatua’ eta Amaia Monterok eta Mikel Erentxunek egindako ’Lau Teilatu’-ren moldaketa, The Uski’s-en ’Zelan’ eta Goseren ’16 eskallera’ zeuden. Onena Ken Zazpirena zela ebatzita, Xabi Prieto Realeko jokalariak eman zion bigarren saria Ken 7ri.

Disko Onenari sariarekin hirugarren galardoa jaso du Ken 7k, Mihiluze saioko Ilaski Serrano eta Kike Amonarrizen eskutik. Gernikarren ’Argiak’ diskoarekin batera, Gariren ’Esperantzara Kondenatua’, El Menton de Fogartyren ’Dias Rojos’, UEK eta Gaztelupeko Hotsak taldearen ’Hotsak Dantzan’ diskoa zeuden lehian.

Zuzeneko onenari atalean Fito&Fitipaldis, Berri Txarrak, Fermin Muguruza, Mikel Erentxun eta Ken 7 ziren hautagaiak. Saria Fito & Fitipaldisek lortu zuen. Oier Mendizabal pilotariak eman zion saria eta Doctor Deseoko Francis Diezek jaso zuen Gernika-Lumon bizi den musikariaren ordez.