Busturialdeko Hitza

Ibarrangeluko eta Gautegiz Arteagako toponimia aztertzen ari dira Nerea Goiria (Muxika, 1983) eta Iratze Elizondo (Bermeo, 1983) filologoak. 2006. urtean hasi ziren ikerketarekin, eta Ibarrangelurekin bukatu dute. Orain, Gautegiz Arteagan ahozko elkarrizketak egin behar dituzte herritarren artean. Horretarako, laguntza beharko dutela esan dute.

Beka baten bitartez hasi ziren bi herrietako toponimoak ikertzen. Urtebetean bukatu behar zuten lana, "baina ezinezkoa da. Bi herriak hedaduraz handiak dira, eta ezin dira urtebetean aztertu", azaldu dute.
Egin duten lanaren emaitzak noiz ikusiko diren ezin dute zehaztu. Baina bukatutakoan herri bakoitzean erakusketa bat jarztea da asmoa. "Horrela, herritarrek lanaren emaitzak ikusi ahal izango dituzte, ea datuak ondo dauden". Ikerketa bera udalen esku geratuko da. "Gero, eurek ikusiko dute horrekin zer egin, liburu bat atera, mapa bat atera edo beste zerbait. Gautegiz Arteagan, esaterako, eskolarako unitate didaktikoak egitea ari dira aztertzen".
Egiten ari diren lanaren balorazio ona egin dute bi filologoek. "Ona da toponimia azterketa bat egitea. Izan ere, etxe asko eraiki dira azken urteetan. Etxe zaharrak bota dituzte berriak egiteko, eta askok ez dituzte antzinako etxeen izena mantendu. Toponimo asko galdu egin dira"